Şerê li beravê / Wêne: Arşîv
Hewlêr (Rûdaw) - Çalakvanê Elewî Hazim Mistefa ragihand ku piştî peymana HSD û Sûriyeyê rewşa berava Sûriyeyê aramtir bûye.
Çend rojên borî li berava Sûriyeyê, li herêmên Elewiyan şer û pevçûnan dest pê kiribû û bi sedan kes hatibûn kuştin ku piraniya wan sivîl bûn.
Fermandarê Giştî yê Hêzên Sûriyeya Demokratîk (HSD) Mezlûm Ebdî û Serokkomarê Demkî yê Sûriyeyê Ehmed Şer şeva borî peymanek îmze kir.
Çalakvanê Elewî Hazim Mistefa beşdarî bernameya Nûrojê ya Rûdawê bû û diyar kir ku piştî vê peymanê rewş aramtir bûye.
Li gorî agahiyên ku Hazim Mistefa dane, doh jî li derdora Laziqiyeyê operasyon hebûn û hinek kom niha jî mal û milkê xelkê dişewitînin.
Wî diyar kir ku xelkê peymana HSD û Sûriyeyê pîroz kiriye û hinek xalên peymanê ji bo Elewiyan jî gelekî girîng in.
Hazim Mistefa diyar kir ku li gundan alozî berdewam dikin û got, piştî ku peymana Mezlûm Ebdî û Ehmed Şer bikeve warê bicihanînê dê “dawî li wan komkujiyan were.”
Wî kifş kir ku tê çaverêkirin ev lihevhatin di saetên bê de bi awayekî baştir bandorê li xelkê bike û komên çekdar ji herêmên Elewiyan vekişin.
Mistefa bal kişand ser wê yekê ku hinek komên şerker ji hundirê Sûriyeyê û bi taybetî jî ji Heleb, Îdlib, Reqa û Dêrazorê hatine û wan berê xwe daye berava Sûriyeyê.
Li gorî Hazim, hinek ji wan komên ku êrişî herêmên Elewiyan kiribû endamên DAIŞê ne û li pey çû:
“Niştecihên qeraxa deryaya Sûriyeyê rastî rewşên dijwar tên. Li herêmên zererbar qutbûna kareba û avê heye.
Şêniyên herêmê di bin rewşên mirovî yên xerab de êşê dikişînin, bi taybetî li taxên Elewiyan ku di rojên borî de bi dijwarî zerer dîtiye rewş dijwar e.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse