Hewlêr (Rûdaw) – Di şerê li berava Sûriyeyê yê navbera artêşa Sûriyeyê û komên çekdar de zêdetirî 70 kesî hatin kuştin.
Li parêzgeha Laziqiyeyê ya Sûriyeyê di navbera komeke çekdar û leşkerên niha yên Wezareta Parastinê ya Sûriyeyê de şer derket.
Tê gotin ku koma çekdar ji leşkerên berê yên artêşa Beşar Esed pêk tê.
Rewangeha Mafên Mirovan a Sûriyeyê (SOHR) ragihand ku di van şer û pevçûnan de herî kêm 70 kes hatine kuştin.
SOHRê diyar kir ku her wiha bi birîndar û dîlgirtî jî hene.
Sûriyeya ku ji sala 2011an ve ji nav dest û lepên şerekî xwînrij nefilitiye dîsa difûre.
Li Laziqiyeyê şer û pevçûnan doh dest pê kir û kêlî bi kêlî berê wan li gurbûnê ye.
Hêzên ewlehiyê yên Sûriyeyê şeva borî li Laziqiyeyê çûn û hatin qedexe kir.
SOHRê berê gotibû ku di pevçûnên xedar û dijwar ên li Laziqiye û Ceblê de herî kêm 48 kes hatine kuştin ku 28 ji wan şervanên alîgirên Esed in û 16 jî endamên hêzên ewlehiyê ne.
Li gorî amarên heman çavkaniyê, 4 sivîl bi destê hêzên ewlehiyê yên Sûriyeyê hatibûn kuştin.
SOHRê ev êriş bi rengê “Êrişa herî tund a li dijî desthilata nû” wesifand ku û diyar kir ku hejmara kuştiyan herî kêm bûye 70.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse