Hewlêr (Rûdaw) - Dema namzedbûna ji bo qeymeqamiya Şingalê bi dawî bû û 10 kesan ji bo wergirtina wê peywirê serî li Encûmena Parêzgeha Nînovayê daye.
Endamê Encûmena Parêzgeha Nînovayê û Endamê Komîteya Wergirtina Karnameyan Mehmûd Xelef ji Rûdawê re axivî û eşkere kir heta niha 10 kesan karnameyên xwe ji wan re şandiye.
14ê Gulanê roja dawî ya xwe namzedbûnê bû.
Li gorî gotina Mehmûd Xelef, Encûmena Komîteya Wergirtina Karnameyan a Nînovayê dê li ser navên namzedan kar bike û navê 3 kesan bide Encûmena Parêzgeha Nînovayê.
Bi rêya dengdanê qeymeqamê Şingalê dê were diyarkirin.
Mehmûd Xelef amaje bi wê yekê jî kir ku Ereb û Kurdên Êzdî ji bo wergirtina posta qeymeqamiyê xwe kirine namzed.
“Berbijêr divê xelkê Şingalê be”
Li gorî gotina Mehmûd Xelef, ji bo namzedbûnê 8 merc hene.
Mercên sereke ew in ku ew kesê xwe berbijêr bike divê ne endamê ti rêxistineke çekdar û hêzê ewlehiyê be.
Namzed, divê xelkê Şingalê be û tawanên wî nebin û ti pêwendiya wî bi rejima Beasê re jî nebe.
Ji sala 2017an ve posta qeymeqamiya Şingalê vala ye.
Yek ji xalên rêkeftina Şingalê ya navbera Îraqê û Herêma Kurdistanê ew e ku qeymeqamek ji bo Şingalê were hilbijartin.
Endamê Encûmena Nînovayê Eyad Kakeyî jî ji Rûdawê re eşkere kir ku roja dengdanê û hilbijartina qeymeqamê Şingalê li Encûmena Nînovayê diyar nebûye.
Eyad Kakeyî û Mehmûd Xelef tekez dikin ku beriya dengdanê û diyarkirina qeymeqamê Şingalê pêwîst e aliyên siyasî li hev bikin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse