Hewlêr (Rûdaw) - Amnesty Internationalê da zanîn ku li kampên Roj û Holê “lêdan, xeniqandin, tundî û şkence” hene.
Kampên Roj û Holê li Rojavayê Kurdistanê ne û di bin kontrola Hêzên Sûriyeya Demokratîk (HSD) de ne.
DAIŞiyên berê û xizmên wan li van kampan dimînin û ji ber ku DAIŞ li van kampan xebatên xwe didomîne ev kamp wekî xetereye mezin tên dîtin.
Amnesty Internationalê di raporeke xwe bal kişand ser rewşa li kampên Roj û Holê û da zanîn ku kamp gelekî qerebalix in.
“Piraniya wan jin û zarok in”
Alîkara Rêveberê Herêmî yê Amnesty Internationalê Aye Meczûbê got:
“Piraniya kesên li wan kampan in jin û zarok in.
Bi piranî destê wan di ti sûcî de nîne û rewşa kampan bi temamî qirêj e.”
Amnesty International ji ber vê rewşê rexneyan li HSDyê digire û berpirsiyariya Amerîkayê bi bîr tîne.
HSD gelek caran bang dike ku hemû dewlet welatiyên xwe ji van kampan bibin lê ev yek pêk nayê.
“Divê wan şkence û binpêkirinan rawestîne”
Aye Meczûbê di berdewamiya axaftina xwe de bal kişand ser berpirsiyariya Amerîkayê û got:
“Divê Amerîka piştrastbûnê bide HSDyê ya ku wê peredar dike.
Divê wan şkence û binpêkirinan rawestîne ku me ew belge kirine.
Divê ji bo tesbîtkirina kesên tawanbar lêkolîn bên kirin û kesên bêsûc bên berdan.
Kesên ku destê wan di tawanên DAIŞê de nîne jî qurbaniyên DAIŞê û divê bên berdan.”
Li gorî rapora Amnesty Internationalê li kamp û girtîgehên HSDyê 56 hezar kes hene ku 30 hezar ji wan zarok in.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse