Hewlêr (Rûdaw) - Dadgeha Federal a Îraqê doza daxwaza hilweşandina Wezareta Ewqaf û Kar û Barên Olî û Wezareta Şehîd û Enfalkiriyan a Herêma Kurdistanê red kir.
Daxwaz ji aliyê kesekî bi navê Xalid Mistefa Husên ve li ser bingeha madeyên 103 û 104ê yên destûrê hatibû pêşkêşkirin û gotibû ku divê ev sazî ne wekî wezaret, wekî saziyên xweser bixebitin.
Seroka Birêvebiriya Kar û Barên Yasayî ya Parlamentoya Kurdistanê Şermîn Behcet Xidirê ji Rûdawê re ragihand:
“Dadgeha Federal ji me re ragihand ku daxwaza hilweşandina her du wezaretan hatiye redkirin.”
Seroka Birêvebiriya Kar û Barên Yasayî ya Parlamentoya Kurdistanê Şermîn Behcet Xidirê diyar kir ku dadgehê bêyî rûniştinê ev biryar daye û got:
“Me di parastina xwe de anî ziman ku ev mijar ne meseleyeke destûrî ye û nakeve çarçoveya desthilata dadgeha federal.
Lê heta niha sedema biryara redkirinê ji me re nehatiye ragihandin.”
Wezareta Ewqaf û Kar û Barên Olî ya Herêma Kurdistanê sala 2007an bi yasayeke Parlamentoya Kurdistanê û Wezareta Şehîd û Enfalkiriyan jî bi yasaya hejmar 8a sala 2006an hatine avakirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse