Hewlêr (Rûdaw) – Wezîrê Karên Navxwe yê Tirkiyeyê Alî Yerlîkaya ragihand ku doh li Wan û şeş parêzgehên din 89 kes hatine desteserkirin.
Piştî ku li Wanê mafê Abdullah Zeydan ê şaredarbûnê hat betalkirin, li seranserê Bakurê Kurdistanê gelek çalakî û xwepêşandan hatin kirin.
Polîsan li gelek deveran êrişî xelkê kir û dîmenên şkenceya polîsan derketin holê.
Wezîrê Navxwe yê Tirkiyeyê Alî Yerlîkaya li ser hesabê xwe yê Xê destnîşan kir ku di van protestoyan de 89 kes hatine desteserkirin.
Li gorî agahiyên ku Alî Yerlîkaya dane, amarên desteserkiriyan li gorî bajaran wiha ne:
Wan: 26 kes
Colemêrg – Gever: 29 kes
Colemêrg – Navend: 9 kes
Sêrt: 4 kes
Êlih: 5 kes
Şirnex: 10 kes
Îzmîr: 6 kes
Bi giştî: 89 kes
Çi bûbû?
31ê Adarê li Tirkiye û Bakurê Kurdistanê hilbijartinên xwecihî hatin kirin.
Namzedê DEM Partiyê Abdullah Zeydan bi rêjeya ji sedî 55,48an bû serokê Şaredariya Bajarê Mezin a Wanê û DEM Partiyê her 14 şaredariyên Wanê standin.
Abdullah Zeydan dema ku parlamenterê HDPyê bû, sala 2016an hatibû girtin û bi Selahattîn Demîrtaş re zêdetirî 6 salan di Girtîgeha Edîrneyê de mabû.
Zeydan sala 2022yan hatibû berdanû piştî ku ji girtîgehê derketibû bi biryara dadgehê qedexeya li ser mafên xwe rakiribû û li ber namzedbûna wî ti asteng nemabûn.
Derket holê ku Wezareta Dadê ya Tirkiyeyê beriya hilbijartinan bi du rojan (29ê Adarê) îtirazî dadgehê kiriye û heman dadgehê jî ev biryara xwe betal kiriye.
Namzedê AK Partiyê Abdulahat Arvas jî li Wanê bi rêjeya ji sedî 27,15an bûbû duyem.
Lê Lijneya Hilbijartinan a Bajêr mazbataya şaredarbûnê da namzedê AK Partiyê.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse