کاریگەریی وشکەساڵی لە هەرێمی کەتەلۆنیا
رووداو دیجیتاڵ
کەنیسەیەک لە شارۆچکەی ڤیلانۆڤا دێ سەوی هەرێمی کەتەلۆنیای ئیسپانیا دوای دەیان ساڵ ژێرئاوکەوتن، بەهۆی وشکەساڵییەکەی ئەمساڵ و دابەزینی ئاستی ئاو، دەرکەوتووەتەوە.
حکومەتی هەرێمی کەتەلۆنیا بڕیاریداوە بەکارهێنانی ئاو سنووردار بکرێت؛ بڕیارەکە بریتییە لە قەدەخەکردنی شوشتنی نێو ماڵ، پڕکردنی مەلەوانگەکان و شوشتنگەی ئۆتۆمبێل و ئاودانی باخچەکان.
کریستینا هێرناندێز، هاووڵاتیی ئیسپانی ئاماژە بەوە دەکات، "هەموو ئەم بەیانییە بەدوای شوشتنگەی ئۆتۆمبێل دەگەڕام و سەرجەمیان داخراون، چونکە حکومەت بڕیاریداوە رایبگرێت. ئێستا دەبێت خۆم ئۆتۆمبێلەکەم پاکبکەمەوە تاوەکو بچمە سەر کارەکەم."
بڕیارەکە کاریگەریی لەسەر 6.7 ملیۆن کەس کردووە، کە دەکاتە 80%ی دانیشتووانی هەرێمی کەتەلۆنیا. بۆ بەشێکی هاووڵاتییانیش ئەو بڕیارە نامۆیە.
هاووڵاتییەکی ئیسپانی دەڵێت، "پێموایە چەند پارکێک هاوشێوەی ئەمە ئاوەکەیان گرتووەتەوە لە کاتێکدا باشترە ئاوەکەی بەردەنەوە، چونکە منداڵان حەزدەکەن لێرە یاری بکەن و سەوزایی ببینن. ئەگەر وانەبێت منداڵەکان دەبێت بڕۆن بۆ دەرەوەی شار تاوەکو لەنێو سەوزایی یاری بکەن."
وشکەساڵی 32%ی خاکی ئیسپانیای گرتووەتەوە, 10 ملیار یۆرۆ زیانی لە کشتوکاڵی وڵاتەکە داوە. ساڵی 2021، یەدەگی ئاوی ئیسپانیا 49.9% بووە، ئەمساڵ بۆ 39.9% دابەزیوە. 75%ی خاکی ئیسپانیا مەترسیی وشکهەڵاتنی لەسەرە.
بە گوێرەی ئامارەکانی وەزارەتی ئیکۆلۆجیی ئیسپانیا، یەدەگی ئاوی هەرێمی کەتەلۆنیا ئێستا تەنیا 34%ی ماوە. بەرهەمهێنانی کارەبا لەڕێگەی کارۆئاوییەوە 50% کەمیکردووە و بووەتە هۆی ئەوەی ئەمساڵ ئیسپانیا 41% زیاتر گازی سرووشتی بەرهەمبهێنێت. ئەمەش کێشەی گۆڕانی کەشوهەوا دژوارتر دەکات.
ساڵی 2008 وشکە ساڵییەک دووچاری ئیسپانیا و بەتایبەت هەرێمی کەتەلۆنیا بووەوە و دۆخەکە بە جۆرێک لە گرێژنە دەرچووبوو، حکومەتی ئیسپانیا بە بەلەم ئاوی خواردنەوەی بۆ خەڵکی هەرێمەکە دابین دەکرد. ئێستا کەتەلۆنییەکان ترسی دووبارەبوونەوەی هەمان سیناریۆیان هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ