رووداو دیجیتاڵ
لە وێستگەیەکی شاری لیۆنی فەرەنسا کەسێک بە چەقۆ سێ کەس بریندار دەکات و دواتر دەستگیر دەکرێت. پۆلیس دەڵێت، دۆخی تەندروستیی بریندارەکان جێگیرە و مەترسیی لەسەر ژیانیان نییە.
پۆلیسی شاری لیۆن لە رۆژهەڵاتی فەرەنسا دەڵێت: "کەسێک لە وێستگەی شەمەندەفەری خێرا [میترۆ]ـی ئەو شارە بە چەقۆ هێرشی کردووە و سێ کەسی بریندار کردووە."
پۆلیس ئەوەشی ئاشکراکردووە، سێ کەسەکە بە سووکی برینداربوون و ژیانیان لە مەترسیدا نییە. دوو کەسیان چەقۆ بەر سکیان کەوتووە و ئەوی دیکە قۆڵی برینداربووە.
پۆلیس دەڵێت: "هێرشەکە تۆمەتی هەوڵی کوشتنی لەسەرە و لێکۆڵینەوە دەستپێکراوە."
محەممەد چیهی، جێگری پارێزگاری شاری لیۆن لە تۆڕی کۆمەڵایەتیی ئێکس بڵاویکردەوە: "بیرمان لای سێ بریندارەکەی وێستگەی ژۆن ژۆغێزە. هێرشکارەکە دەستگیرکراوە و سوپاسی پۆلیس و بەرگریی شارستانی دەکەین. شاری لیۆن سەرکۆنەی ئەم رووداوە جدییە دەکات."
میدیای فەرەنسا دەڵێت، تۆمەتبارەکە تەمەنی 27 ساڵە و پێشینەی تاوانی هەبووە.
لە رووداوێکی هاوشێوەدا، لە 18-04-2024 پیاوێک بە چەقۆ هێرشی کردە سەر دوو کچە قوتابی لە نیزک قوتابخانەی خۆیان کە تەمەنیان 6 ساڵ و 11 ساڵ بوو. ئەوکات پۆلیس رایگەیاند: "برینی کچەکان سەخت نییە و هێرشکارەکە دەستگیرکراوە."
هەروەها، لە 03-02-2024 پیاوێک لە وێستگەیەکی شەمەندەفەری شاری پاریسی پایتەختی فەرەنسا، بە چەقۆ سێ کەسی بریندار کرد و دەستگیرکرا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ