کۆچبەرە کوردە ئێزدییەکان؛ ڤیدیۆکە بە تایبەت بۆ رووداو نێردراوە
رووداو دیجیتاڵ
شەش کۆچبەری کوردی ئێزدی کە ژن و منداڵیشیان لەگەڵدان، لە دارستانەکانی رۆژهەڵاتی باکووری یۆنان بێ خواردن و رێنیشاندەر، گیریانخواردووە و داوای بەهاناوەچوون دەکەن. یەکێک لە کۆچبەرەکان لە رێگەی تەلەفۆنەوە بە رووداوی گوت، "بارودۆخمان زۆر خراپە، خواردن و خواردنەوەمان پێنەماوە و نازانین بۆ کوێ بڕۆین."
بەهیوای گەیشتن بە ژیانێکی خۆشتر لە ئەوروپا، سێ رۆژ لەمەوبەر لە ئیستەنبووڵەوە بە ئۆتۆمبێلێک گەیێندراونەتە سەر رووباری مەریچ لەنێوان تورکیا و یۆنان، لەوێ قاچاخچییەکە شەش کۆچبەرە کوردە ئێزدییەکەی جێیهێشتووە و پێی گوتوون رێگەی 10 کاژێر بە پێ بڕۆن تا دەگەنە نێو شار. کۆچبەرە کوردەکان بە چووپ لە ئاوەکە پەڕیونەتەوە بۆ نێو سنووری یۆنان و، ماوەی سێ رۆژە رێگەیەکی سەختی شاخاویی و دارستانی چڕیان بڕیوە، بەسەر 6 چیادا هەڵگەڕاون و 10 کیلۆمەتر لە سنوور دوورکەوتوونەتەوە، ئەمە وەک کۆچبەرەکە بە رووداوی گوت.
گرتەیەکی ڤیدیۆیی لەلایەن کۆچبەرەکەوە بۆ رووداو نێردراوە، کە پێشانی دەدات، کۆچبەرەکان ماندوو و شەکەت لەسەر زەوی راکشاون.
ئەو ژن و کچەی لەگەڵیاندا، هاوژین و کچی ئەو کۆچبەرەن کە قسەی بۆ رووداو کرد، کە نایەوێ ناویان ئاشکرا بکرێت. لە ڤیدیۆکەدا لە بارەی هاوژینەکەیەوە دەڵێت: "لە بەیانییەوە 10 جار بەربووەتەوە،" دەڵێت کچەکەشی "لە لێواری مردندایە."
کۆچبەرەکان داوا دەکەن کەسێک بەهانایانەوە بچێت، چونکە خواردنیان تەواوبووە و ئەو ئاوە کەمەشی پێیانماوە، لە دارستانەکانی ناوچەی سۆفلی یۆنان دەستیانکەوتووە.
ئەو کۆچبەرەی قسەی بۆ رووداو کرد و گوتی، لە کاژێر 03:00ـی دواینیوەڕۆوە پەیوەندیی بە پۆلیس و رێکخراوەکانەوە کردووە، پێیان گوتووە 'فریاتان دەکەوین'، بەڵام "چوار کاژێر زیاتر رۆشتووە و تائێستا کەس بەهانامانەوە نەهاتووە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ