وەزارەتی دەرەوەی ئەمریکا بۆ رووداو: پابەندین بە برەودان بە پەیوەندییە بەهێزەکەمان لەگەڵ هەرێمی کوردستان

 

رۆژی هەینی 16-08-2024، گوتەبێژێک بەناوی وەزارەتی دەرەوەی ئەمریکا بە دیار کوردە، بەڕێوەبەری نووسینگەی رووداوی لە واشنتن راگەیاند، "پابەندین بە برەودان بە پەیوەندییە بەهێزەکەمان لەگەڵ هەرێمی کوردستان، ئەوەش بۆ بۆ باشترکردنی ئامانجە هاوبەشەکانمان لە ئاسایش، گەشانەوەی ئابووری و بەرەوپێشچوونی دیموکراسییەت".

 

ئەو گوتەبێژە ناونەهێندراوە ئاماژەی بەوەشکرد، "ستیڤ بیتنەر، کۆنسووڵی گشتیی نوێی ئەمریکا لە هەولێر پشتگیری لە هەوڵەکانی چاکسازی لە هێزەکانی پێشمەرگە دەکات بۆ دڵنیابوونەوە لە تێکشکاندنی داعش، باشترکردنی ئابووریی هەرێمی کوردستان و پشتگیریکردن لە هەڵبژاردنێکی دادپەروەرانە لە 20ـی ئۆکتۆبەر. باڵەخانەی نوێی کۆنسووڵخانەکەمان بەڵگەی پابەندیی نەگۆڕمانە بۆ پەیوەندییەکانی نێوان هەرێمی کوردستان و ئەمریکا."

 

هەرچی لەبارەی داهاتووی هێزەکانی ئەمریکا و هاوپەیمانانە، ئەو گوتەبێژە گوتی، لە پارەوە لەگەڵ حکومەتی عێراق لەو بارەیەوە لە گفتوگۆدان، لەوانەش سەردانەکەی محەممەد شیاع سوودانی، سەرۆکوەزیرانی عێراق بۆ واشنتن لە نیسانی 2024 و پەیوەندییە تەلەفۆنییەکەی نێوان ئەنتۆنی بلینکن، وەزیری دەرەوەی ئەمریکا و سوودانی لە 11ـی ئاب.

 

گوتەبێژەکەی وەزارەتی دەرەوەی ئەمریکا بە دیار کوردەی گوت، "بڕوامان وایە کە نزیکین لە رێککەوتنێک، بەڵام جارێ هیچ شتێک راناگەیێنین. ئەم پرۆسەیە پشت بە گفتوگۆ ستراتیژییە دوو قۆڵییەکانی پێشوو دەبەستێت کە لەبارەی پابەندیی دوولایەنە بوون تایبەت بە هاوئاهەنگیی ئەمنی و بەرژەوەندیی هاوبەشی هەردوولا لە برەودان بە سەقامگیریی هەرێمی."

 

 

 

گوتەبێژێکی وەزارەتی دەرەوە: ئەمریکا پابەندە بە برەودان بە پەیوەندییە بەهێزەکەی لەگەڵ هەرێمی کوردستان، باشترکردنی ئامانجە هاوبەشەکانمان لە ئاسایش، گەشانەوەی ئابووری و بەرەوپێشچوونی دیموکراسییەت. کۆنسووڵی گشتیی نوێی ئەمریکا لە هەولێر پشتگیری لە هەوڵەکانی چاکسازی لە هێزەکانی پێشمەرگە دەکات بۆ دڵنیابوونەوە لە بەزاندنی داعش، باشترکردنی ئابووریی هەرێمی کوردستان و پشتگیریکردن لە هەڵبژاردنێکی دادپەروەرانە لە 20ـی ئۆکتۆبەر. باڵەخانەی نوێی کۆنسووڵخانەکەمان بەڵگەی پابەندیی نەگۆڕمانە بۆ پەیوەندییەکانی نێوان هەرێمی کوردستان و ئەمریکا.

 

 

گوتەبێژێکی وەزارەتی دەرەوە: لە پارەوە لەگەڵ حکومەتی عێراق لەبارەی داهاتووی هێزەکانی هاوپەیمانان لە گفتوگۆداین، لەوانەش سەردانەکەی سەرۆکوەزیرانی عێراق بۆ واشنتن لە نیسانی 2024. بەردەوام دەبین لە گفتوگۆی بەرهەمدار، هەروەک لە پەیوەندییە تەلەفۆنەکەی نێوان وەزیری دەرەوەی ئەمریکا و سەرۆکوەزیرانی عێراق لە 11ـی ئاب جەختی لەسەر کرایەوە. گفتوگۆکان بەردەوامن. ئێمە بڕوامان وایە کە نزیکین لە رێککەوتنێک، بەڵام جارێ هیچ شتێک راناگەیێنین. ئەم پرۆسەیە پشت بە گفتوگۆ ستراتیژییە دوو قۆڵییەکانی پێشوو دەبەستێت کە لەبارەی پابەندیی دوولایەنە بوون تایبەت بە هاوئاهەنگیی ئەمنی و بەرژەوەندیی هاوبەشی هەردوولا لە برەودان بە سەقامگیریی هەرێمی.