وەزیری دارایی بەریتانیا: هانی هەولێر و بەغدا دەدەین ناکۆکییەکانیان لەسەر پرسی وزە چارەسەر بکەن

 

 

نەدیم زەهاوی، وەزیری دارایی بەریتانیا، لە لێدوانێکی تایبەتدا وەڵامی دیار کوردە، پەیامنێری تۆڕی میدیایی رووداوی دایەوە و رایگەیاند: "بەدڵنیاییەوە من هانی سەرۆکوەزیرانی هەرێمی کوردستان دەدەم، کە سووربێت لەسەر هەنگاوەکانی بۆ گەیشتن بەوەی کە بتوانن بە یەکەوە کاربکەن تاوەکو هەموو عێراق سەقامگیر و جێگیر و خۆشگوزەران بێت".

 

نەدیم زەهاوی، وەزیری دارایی بەریتانیا بەمەبەستی کۆبوونەوە لەگەڵ هاوتا ئەمریکییەکەی بۆ گفتوگۆکردن لەسەر پرسی وزە و چارەسەرکردنی قەیرانی وزە، کە بەهۆی شەڕی ئۆکرانیاوە دروستبووە، سەردانی واشنتنی کرد، بڕیاریشە ئەمڕۆ هەینی لەگەڵ وەزیرانی دارایی گرووپی حەوت کۆببێتەوە و لە کۆبوونەوەکەی گرووپی حەوتیش باس لە پرسی نەوت و چۆنێتیی چارەسەرکردنی قەیرانی وزە دەکەن.

 

ناکۆکییەکانی نێوان عێراق و هەرێمی کوردستان لەسەر پرسی وزە زیاتر بوون، کاتێک لە شوباتی ئەمساڵدا دادگەی باڵای فیدراڵیی عێراق بڕیارێکی لە دژی هەرێمی کوردستان دەرکرد و رایگەیاند: یاسای نەوت و گازی هەرێمی کوردستان "نادەستوورییە."

 

وەزیری دارایی بەریتانیا دەڵێت: "من سەرۆکوەزیرانی عێراق دەناسم و ئەویش پشتیوانکارێکی گەورەیە لەوەی کە پەیوەندییەکانی نێوان حکومەتی هەرێمی کوردستان و حکومەتی عێراق سەرکەوتووبن و ببنە هۆکاری خۆشگوزەرانی بۆ هەموو عێراق."

 

سەبارەت بە پلانی ناردنی کۆچبەران لە بەریتانیاوە بۆ رواندا، رووداو پرسیاری لە وەزیری دارایی بەریتانیا کرد، کە ئەو پرسە بە کوێ گەیشت؟ نەدیم زەهاوی گوتی: "بڕیاری ناردنی کۆچبەران بۆ رواندا شوێنی خۆی گرتووە و دڵنیادەبینەوە لە جێبەجێکردنی".

 

 

 

نەدیم زەهاوی: زۆر هانیان دەدەین، پێموایە زۆر گرنگە سەرۆکوەزیرانی عێراق کە من دەیناسم پشتیوانکارێکی گەورەیە لەوەی کە پەیوەندییەکانی نێوان حکومەتی هەرێمی کوردستان و حکومەتی عێراق سەرکەوتوو بن و ببنە هۆکاری خۆشگوزەرانی بۆ هەموو عێراق. بەدڵنیاییەوە من هانی سەرۆکوەزیرانی هەرێمی کوردستان دەدەم کە بەردەوام بێت لەسەر ئەم هەنگاوانەی بۆ گەیشتن بەوەی بتوانن بە یەکەوە کاربکەن تاوەکو هەموو عێراق سەقامگیر و جێگیر و خۆشگوزەران بێت. ئەوەش دەزانم کە سەرۆکوەزیرانی کوردستان، بارزانی پێداگرە لەسەر ئەوەی دڵنیاببێتەوە کە هەرێمی کوردستان دەتوانێت هایدرۆکاربۆنە بەنرخەکەیان هەناردەی تەواوی جیهان بکات، ئەمەش لەکاتێکدا ئێمە هەموومان پێویستمان بەوەیە بەیەکەوە کاربکەین بۆ هەبوونی سەقامگیری لە کەرتی نەوتدا، یەکێکیش لە هۆکارەکانی سەردانەکەی منە بۆ ئێرە و کۆبوونەوەم لەگەڵ وەزیری ئێلن. هەروەها بەشێک لەو قسانەش کە بیستت لەسەر جێگیری نرخی نەوت، ئێمە نامانەوێت شۆکێکمان لە کەرتی نەوتدا لە ساڵی 2023 و دواتریش هەبێت.

 

 

نەدیم زەهاوی: ئەو بڕیارە شوێنی خۆی گرتووە و دڵنیادەبینەوە لەوەی کە بە شێوەیەکی سەرکەوتووانە بخرێتە بواری جێبەجێکردنەوە، حکومەت سوورە لەسەر ئەو بڕیارە و لەگەڵ حکومەتی رواندا لە کارکردنداین. رواندا شوێنێکە کە پێویستی بە کۆچبەری زیاتر هەیە. ئابووریی خۆی بە شێوەیەکی سەرکەوتووانە بنیات دەنێت. پێموایە ئەوە بڕیارێکی دروستە و وڵاتانی دیکەی ئەوروپاش دەیانەوێت لەگەڵ حکومەتی رواندا و وڵاتانی دیکەش رێککەوتنی هاوشێوە بکەن. ئێمە ئەوە یەکەم وڵات بوو کە سەرنجمان لەسەر دانا، بەڵام وڵاتی دیکەش دەبن لە داهاتوودا.

 

 

نەدیم زەهاوی: پێموایە ئەمە وا دەکات ئەو مۆدێلە بازرگانییە تێکبشکێنێت کە مافیاکان و تاوانکاران دروستیان کردووە و قۆرخی خەڵکی بێ تاوان لە شوێنی جیاوازی جیهانەوە دەکەن و ژیانیان دەخەنە مەترسییەوە لە رێگەی ئەو بەلەمە بچووکانەوە. بەڕاستی ئەمە زۆر خراپە و زۆر دڵشکێنە کە دەبینی ژیانی گەنج و خەڵکی بێ تاوان بەو شێوەیە لە دەست دەدرێن، خەڵکی بەو شێوەیە قۆرخیان دەکەن. بۆیە دەمانەوێت کۆتایی بەو بازرگانییە بهێنین. لەبەر ئەوەشە پێموایە بڕیارەکەی رواندا بڕیارێکی دروستە، چونکە ئەوە پەیامێکی زۆر روون دەنێرێت کە ئەگەر دەتەوێت بێیت بۆ شانشینی یەکگرتوو بە شێوەیەکی یاسایی داوای هاتن بکە، ئێمە تەماشای داواکارییەکەت دەکەین، بەڵام ئەگەر بە نایاسایی بێیت ئەوا راستەوخۆ دەنێردرێیتە رواندا.