ڤیدیۆ؛ هەشتەم پاڵەوانێتیی شەهید شیفا کۆتاییهات و تیپی 15 سپۆرت بووە پاڵەوان

 

 

رێوڕەسمی یاری کۆتایی پاڵەوانێتیی شەهید شیفا گەردی بۆ تیپە میللییەکان لە دهۆک کۆتاییهات، یارییەکە لە نێوان هەردوو تیپی 15 سپۆرت و پێشەوا لە ئەکادیمیای سیروانی وەرزشی بەڕێوەچوو.

 

وێنەیەکی گەورەی شەهید شیفا گەردی و کەروێشکێک کە بووەتە سیمبوڵ لەنێو یاریگەدا پێشاندران.

 

یارییەکە بەهێزەوە دەستیپێکرد، هەردوو تیپ هەوڵی زۆریاندا و هێرشی مەترسیداریان بردە سەر گۆڵی یەکدی، بەڵام نیوەی یەکەم هیچ گۆڵێکی بەخۆیەوە نەبینی.

لە نیوەی دووەمدا هێرشەکانی تیپی پێشەوا زیاتر بوون، بەڵام یاریزانانی 15 سپۆرت توانیان پارێزگاری لە گۆڵەکەیان بکەن و نیوەی دووەمیش بە یەکسانبوون بەبێ گۆڵ تەواو بوو.

 

بەپێی یاسای پاڵەوانێتییەکە، هەردوو تیپ راستەوخۆ پەنایان بردە بەر لێدانەکانی یەکلاکەرەوە و تیپی 15 سپۆرت بە چوار لێدان بەرامبەر سێ لێدان سەرکەوتنی بەدەستهێنا و بووە پاڵەوان.

 

ئاشتی کەریم، کاپتنی تیپی 15 سپۆرت لە دوای یارییەکە بە رووداوی گوت، "تیپی پێشەوا تیپێکی بەهێزە، بەڵام تیپی 15 سپۆرتیش بەمدواییە بووەتە تیپێکی بەهێز و ئەمە چوارەم نازناوی ئێمەیە لەم مانگەدا دەیبەینەوە".

 

لەلایەن خۆیەوە سابیر عەبدولکەریم، یاریزانی تیپی پێشەوا دەڵێت، "کاتێک یاری دەگاتە لێدانەکانی یەکلاکەرەوە، بەخت رۆڵ دەبینێت، تیپی 15 سپۆرت سەرکەوتنی بەدەستهێنا و پیرۆزباییان لێدەکەین".

 

بورهان عەبدولمەجید، سەرپەرشتیاری پاڵەوانێتیی شەهید شیفا گەردی بە رووداوی گوت، "لە رێگەی وەرزشەوە جارێکی دیکە یادی شەهید شیفا گەردی و هەموو شەهیدانی کوردستانمان کردەوە، ئەمە سیمبولێکی بچووکە و ئێمەی وەرزشڤانانی دهۆک هاوخەمی خۆمان بۆ ماڵباتی شەهید شیفا گەردی پێشاندەدەین".

 

دوای کۆتاییهاتنی پاڵەوانێتییەکە باشترین یاریزان و گۆڵپارێزی پاڵەوانێتییەکە و تیپی براوە خەڵاتکران و خەڵاتێکی تایبەتیش درایە ماڵباتی شەهید شیفا گەردی.

 

پاڵەوانێتیی شەهید شیفا گەردی، بۆ یەکەمجار لە 1-6-2017 ئەنجامدرا و ماوەی حەوت ساڵە بۆ تیپە میللییەکانی پارێزگای دهۆک رێکدەخرێت.