ڤیدیۆ؛ کامیرۆن گەیشتە چوارگۆشەی زێڕین

 

کامیرۆنی میوانداری پاڵەوانێتییەکە لە قۆناخی هەشتدا رووبەڕووی گامبیا بووەوە و 2-0 لێیبردەوە.

 

کامیرۆن کۆتایی بە سوپرایزەکەی گامبیا هێنا، کە یەکەمجار بوو بەشداری لە جامی نەتەوەکانی ئەفریقادا بکات.

 

نیوەی یەکەم بەبێ گۆڵ کۆتاییهات، ئەگەرچی خاوەن ماڵ چەندجارێک نزیکبوو لە گۆڵکردن.

 

لە نیوەی دووەمدا تۆکۆ ئیکامبی بە ئاستێکی بەرز دەرکەوت و دوو گۆڵی بۆ کامیرۆن تۆمارکرد، کە بەسبوون بۆ بەدەستهێنانی یەکەم بلیتی قۆناخی پێشکۆتایی پاڵەوانێتییەکە.

 

ئیکامبی 5 خولەک دوای دەستپێکردنی نیوەی دووەم کامیرۆنی بە گۆڵێک پێشخست، دوای 7 خولەکی دیکە گۆڵی دووەمی خۆی و کامیرۆنی تۆمارکرد و یارییەکە بەو ئەنجامە کۆتاییهات.

 

هەڵبژاردەی کامیرۆن چاوەڕێی براوەی یاریی میسر و مەغریب دەکات کە ئەمشەو رووبەڕووی یەکدی دەبنەوە، بۆ ئەوەی لە قۆناخی پێشکۆتاییدا رووبەڕووی ببێتەوە.