کامیرۆن پیلانێکی هەیە بۆ بردنەوەی جامی نەتەوەکانی ئەفریقا؟

 

لە یاریی کامیرۆن و دوورگەکانی قەمەردا 13 یاریزان و راهێنەری دوورگەکانی قەمەر نەیانتوانی ئامادەبن، بەهۆی ئەوەی کە ئەنجامی پشکنینەکان دەریانخست کە تووشی کۆرۆنا بوونە، تەنانەت گۆڵپارێزانی دووەم و سێیەم عەلی ئەحمەدا و موئەیەد ئۆسینی لەنێویاندا بوون و لەبەرئەوەی سالم بن بۆنیای گۆڵپارێزی سەرەکیش تووشی پێکان بووبوو، شاکر هەدهۆر، کە بەرگریكاری باڵی چەپی ھەڵبژاردەی دوورگەكانی قەمەر و یانەی ئەجاکسیۆی خولی پلە دووی فەرەنسایە، بە ناچاری بووە گۆڵپارێز.

 

بەر لە یارییەکە گومان لە ئەنجامی پشکنینی یاریزانەکانی دوورگەکانی قەمەر هەبوون و دوای یارییەکەش گومانەکان زیاتر بوون، کامیرۆنییەکان و بەتایبەتیش ساموێل ئیتۆی سەرۆکی یەکێتیی تۆپی پێی کامیرۆن بەوە تۆمەتبارکران کە یارییان بە ئەنجامی پشکنینەکان کردووە، بۆ ئەوەی تیپی رکابەریان لە تواناکانی زۆرترین یاریزانی بێبەش بێت و رێگە لە بەردەم کامیرۆندا ئاسان ببێت بگاتە قۆناخی هەشتی پاڵەوانێتییەکە.

 

ساموێل ئیتۆ هەر زوو هاتە سەر هێڵ و بە توندی رەتیکردەوە پیلانێکی لەو شێوەیە لە ئارادابێت و گوتی "درۆیە کە دەگوترێت لیژنەی پشکنینی کۆرۆنا سەر بە یەکێتیی تۆپی پێی کامیرۆنە، بەڵکو 100٪ سەر بە یەکێتیی تۆپی پێی ئەفریقایە".

 

ئیتۆ داوای کرد رێز لە وڵاتەکەی بگرن و گوتی "رێکارەکانی مامەڵەکردن لەگەڵ کۆرۆنا بۆ هەموو لایەک روون و ئاشکران، تونس 7 حاڵەتی تووشبوونی هەبوو و بەرامبەر نەیجیریا یارییان نەکرد، خۆ یارییەکەی بەرامبەر نەیجیریا نەبوو، مەغریبیش بەو هۆکارەوە لە چەند یاریزانێکی بێبەشبوو".

 

بەپێی یاساکانی جامی نەتەوەکانی ئەفریقا، هەر تیپێک 11 یاریزانی لەبەردەستبێت، پێویستە یارییەکەی بکات و ئەگەر هیچ گۆڵپارێزێکیشی لەبەردەست نەبێت، پێویستە یاریزانێک رۆڵی گۆڵپارێز بگێڕێت.