رووداو دیجیتاڵ
تیپی جۆدۆی یانەی هەولێر، بەشداری لە پاڵەوانێتییەکی نێودەوڵەتی دەکات، کە شاری مەشهەدی ئێرانی میوانداری کردبوو. نوێنەرێکى فیدراسیۆنی جودۆى هەرێمی كوردستان، بە رووداوی گوت "ئاڵای کوردستان هاوشانی ئاڵای وڵاتانی جیهان هەڵواسرابوو".
دوای ئەوەی لە لە 8ـی1ـی2025 رێککەوتننامەیەکی هاوئاهەنگی لەنێوان فیدراسیۆنی جۆدوی ئێران و فێدراسيونی جۆدۆی کوردستان و یەکێتی جۆدۆی هەولێر واژۆکرا، تیپی جۆدۆی یانەی هەولێر وەک یەکەم چالاکی لە ساڵی 2025 لەسەر بانگهێشتنامەی فیدراسیۆنی جۆدوی ئێران بەشداری لە پاڵەوانێتییەکی نیودەوڵەتی لەو وڵاتەدا کرد.
ساڵح يوسف رەمەزان، نوێنەرى فیدراسیۆنی جودۆى هەرێمی كوردستان، لەو بارەیەوە بە تۆڕی میدیایی رووداوی راگەیاند "لەلایەن فێدراسیونی جۆدوی ئێرانەوە بەفەرمی بانگێشتکراین بۆ بەشداریکردن له پاڵەوانیەتی جودۆی نێودەوڵەتی پیشکەوتووانی ECO CUP کە لە پارێزگای مەشهەد بەڕێوەچوو، سێ رۆژی خایاند، کە لە 19ـی2ـی2025 دەستیپێکرد و لە 21ـی2ـی2025 کۆتاییهات".
وەک ئەو نوێنەرەی فیدراسیۆنی جودۆى هەرێمی كوردستان باسی دەکرد، پاڵەوانێتییەکە بە بەشداری 15 یانە لە وڵاتانی ئێران، تاجیکستان، عێراق، ئەفغانستان و جۆرجیا و چەند وڵاتێکی دیکە بەڕێوەچوو".
ستافی سەرپەرشتانی تیپی جۆدۆی یانەی هەولێر پێکهاتبوو لە بەهێز تەحسين، سەرۆکی فیدراسیۆنی جۆدۆی هەولێر، ساڵح يوسف، نوێنەرەی فیدراسیۆنی جودۆى هەرێمی كوردستان و هەردوو راهێنەر ئادەم سابر و ئاراس کاکه لەگەڵ 7 یاریزان و ئارین عەبدولڕەحمانی ناوبژیوان.
ساڵح یوسف، بە رووداوی گوت "تیپی جۆدۆی یانەی هەولێر توانی لەم پاڵەوانێتییەدا ئاستێکی باش پێشکەش بکات، هەرچەندە نەیتوانی لە پلەکانی یەکەم بێت بەهۆی ئاستبەرزی و بەهێزیی یاریزانان و تیپەکانی جۆدۆی ئێران".
ئەو هەروەها گوتی "جێگای شانازییه کە لە کاتی بەڕێوەچوونی رێوڕەسمی پاڵەوانێتییەکدا، بەئامادەبوونی بەرپرسانی باڵای ئێرانی، ئاڵای پیرۆزی کوردستانیش له ریزی ئاڵای وڵاتانی بەشداربووی بیانی هەڵواسرابوو".
ساڵح يوسف رمضان، کە ئەندام و سەرۆکی لیژنەی تەکنیکی فیدراسیۆنی جودۆی کوردستان و راهێنەری پرۆفیشناڵی جۆدۆ و ناوبژیوانی پلەیەکی عێراقە، گلەیی ئەوەی هەبوو کە بەرپرسانی وەرزشیی کوردستان کەمتەرخەمییەکی بێ سنووریان لە ئاست ئەم وەرزشە و تیپەکەیاندا هەیە، بۆیە داوای پشتگیری لە سەرۆکی حکومەتی هەرێمی کوردستان دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ