رووداو هەولێر
راهێنەری یانەی ئیستقلالی تاران دژی قەدەخەکردنی بڵاوکردنەوەی وێنەی وریا غەفووری، کاپتنی یانەکە لە میدیای فەرمیی ئێران ناڕەزایەتیی دەردەبڕێت و دەڵێت، تاوەکو کۆتایی بەوە نەهێنن، ئەویش ئامادەنییە قسە بۆ میدیای ئێران بکات.
فەرهاد مەجیدی، راهێنەری یانەی ئیستقلالی تاران، رۆژی هەینی 20-05-2022 دوای تەواوبوونی یاریی یانەکەی لەگەڵ یانەی ئەراک، ئامادەنەبوو وەڵامی پرسیاری رۆژنامەڤانی میدیای فەرمیی ئێران بداتەوە و گوتی، دەبێ روونی بکەنەوە بە چ مافێک وێنەی کاپتنی یانەکەی لە میدیای ئەو وڵاتە بڵاو ناکرێتەوە.
فەرهاد مەجیدی دەڵێت، وەڵامی میدیای ئێران ناداتەوە تاوەکو کۆتایی بەو کارە نەهێنن.
لە تۆڕە کۆمەڵایەتییەکاندا ژمارەیەکی زۆر لە یاریزان و کەسانی ناسراو و خەڵکی ئاسایی دژی قەدەخەکردنی بڵاوکردنەوەی وێنە و ڤیدیۆی وریا غەفووری لە میدیای ئێران هەڵوێستیان هەبووە و هاشتاگێک بەناوی "وریا تەنیا نییە" رێکخراوە و پشتگیری لەو یاریزانە کوردە دەکەن.
شەوی دووشەممە لە کەناڵی سێی ئێران بەرنامەیەکی وەرزشی لەبارەی بەدەستهێنانی ناسناوی پاڵەوانێتیی خولە نایابەکانی ئێران لەلایەن ئیستقلالی تارانەوە بڵاوکرایەوە و وێنەی یاریزانەکانی ئەو یانەیە لەکاتی قسەکردنی میوانەکان لەسەر شاشەکانی ستۆدیۆ پیشاندرا، بەڵام وێنەی وریا غەفووری، کاپتنی یانەکەی تێدا نەبوو.
دوای ئەوە بڵاوکرایەوە کە بڵاوکردنەوەی وێنە و ڤیدیۆی وریا غەفوری لە میدیای فەرمیی ئێراندا قەدەخەکراوە، ئەوەش بەهۆی هەڵوێستەکانی لە پشتگیریکردن لە خەڵکی ناڕازیی ئێران.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ