وەرزی نوێی پرێمەرلیگ دەستپێدەکات و رووداو خەڵاتی ملیۆنی دەداتە براوەکانی فانتاسی

 

 

 

کاژێر 22:00 لەسەر یاریگەی ئۆڵدترافۆرد لە یەکەم یاریی وەرزی 2024-2025 یانەی مانچێستەر یونایتد دوای ئەوەی لە وەرزی رابردوودا نەیتوانی ئەنجامی باش بەدەستبهێنێت و لە دەستپێکی ئەم وەرزەشدا یاریی قەڵخانی ئینگلتەرای بە مانچێستەر سیتی دۆڕاند، بەرامبەر یانەی فولهام یاریی دەکات.

 

یانەی مانچێستەر یونایتد سەرەڕای ئەوەی وەرزی رابردوو ئەنجامەکانی وەکو پێویست نەبوون، متمانەی دایەوە بە ئێریک تێن هاگ و بۆ ئەم وەرزەش گرێبەستی لەگەڵ هەریەکە لە لینی یۆرۆ بەرامبەر 62 ملیۆن یۆرۆ، جۆشوا زیرکزی بەرامبەر 42 ملیۆن یۆرۆ، ماتیاس دیلێخت بەرامبەر 45 ملیۆن یۆرۆ و نوسەیر مزراوی بەرامبەر 15 ملیۆن یۆرۆ واژۆکردووە.

 

جگە لەوەش یانەکە بۆ ئەم وەرزە جادۆن سانچۆی گەڕاندووەتەوە یانەکە، دوای ئەو ئاستەبەرزەی لە وەرزی رابردوودا لەگەڵ یانەی بۆرووسیا دۆرتموند پێشکێشیکرد.

 

لەبەرامبەردا هەر لە گواستنەوەی ئەم هاوینەدا 10 یاریزان ریزەکانی یانە سوور پۆشەکەی مانچێستەریان بەجێهێشتووە، دیارترینیان رافایێل ڤاران و ئارۆن وان بیساکان، کە ئەوەی یەکەمیان چووە یانەی کۆمۆی ئیتاڵی و ئەوەی دیکەشیان پەیوەندیی بە ریزەکانی یانەی وێستهامەوە کرد.

 

یانەی فولهام گۆڕانکاری زۆری لە تیپەکەیدا کردووە، دە یاریزان یانەکەیان بەجێهێشتووە کە دیارترینیان جواو پالینیایە و بەرامبەر 51 ملیۆن یۆرۆ پەیوەندیی بە ریزەکانی یانەی بایرن میونشنی ئەڵمانییەوە کردووە.

یانەکە لە گواستنەوەی ئەم هاوینەدا گرێبەستی لەگەڵ هەشت یاریزانی نوێ کردووە، سمیس رۆی، یاریزانی پێشووی یانەی ئارسیناڵ یەکێکە لە دیارترین ئەو یاریزانانە و بەرامبەر 31 ملیۆن یۆرۆ پەیوەندیی بە ریزەکانی یانەکەوە کردووە.

 

ئەمڕۆ تەنیا یەک یاری بەڕێوەدەچێت، رۆژی شەممە و یەکشەممە یارییەکانی دیکەی گەڕی یەکەمی پرێمەرلیگ بەڕێوەدەچن.

 

 

بۆ وەرزی نوێی خولی تۆپی پێی ئینگلتەرا، تۆڕی میدیایی رووداو لیگی تایبەتی بە فانتاسی پرێمەرلیگ دەبێت، براوەکانی فانتاسی لە رووداو خەڵاتی گرانبەهایان پێدەدرێت.

 

خەڵاتەکانی رووداو بۆ ئەم وەرزەی پرێمەرلیگ دەگەنە 14 ملیۆن دینار، بۆ هەر مانگێک راهێنەری براوە مۆبایلێکی هواویی گرانبەها وەردەگرێت، لە هەمان کاتدا ناوی براوەکە بۆ کۆتایی وەرز دەچێتە نێو تیروپشکی بردنەوەی خەڵاتێکی زۆر گەورە و سەرنجڕاکێش.

جگە لەوەش رۆژانی پێنجشەممە، پۆدکاستی فانتاسی رووداو لە رادیۆی رووداو و پەیجی رووداو سپۆرتس پێشکێشدەکرێت، تێیدا سەرجەم وردەکارییەکانی تایبەت بە هەفتەی پرێمەرلیگ و چۆنیەتی مامەڵەکردن لەگەڵ یاریزانەکان لە فانتاسیدا دەخرێنەڕوو.

 

وەرگرانی رووداو، لە رێگەی کۆدی LRF666 دەتوانن بچنە نێو لیگی فانتاسی رووداو، بۆ ئەوەی هەلی بردنەوەی خەڵاتە گرانبەهاکانیان هەبێت.