مێسی و رامۆس
رووداو دیجیتاڵ
یانەی پاریس سانجێرمانی فەرەنسی، لە رێورەسمێکی شایستە و سەرنجڕاکێشدا، ئەستێرەی نوێیەکانی یانەکەی بە میدیا و هاندەران ناساند، لیۆنێل مێسی و سێرخیۆ رامۆسیش پەیامیان ئاراستەی هاندەرانی یانە فەرەنسییەکە کرد.
بە ئامادەبوونی زیاتر لە 47 هەزار هاندەر، یانەی پاریس سانجێرمان هەریە لە لیۆنێل مێسی، سێرخیۆ رامۆس، جیانلویجی دۆنارووما، جۆرجینیۆ ڤایناڵدۆم و ئەشرەف حەکیمی، یاریزانانی نوێی یانەکەی ناساند، کە لە گواستنەوەی ئەم هاوینەدا گوازراونەتەوە یانەکە.
مێسی و رامۆس لە لای یەکدییەوە لەسەر ستەیجی پێشوازی وەستان و سڵاویان لە هاندەرانی یانەکە کرد، لیۆ پەیامێکی ئاراستەی هاندەران کرد و گوتی " بە هەفتەیەکی زۆر نایابدا تێپەریم، زۆر سوپاسی ئەم پێشوازییە سەرنجڕاکێش و گەورەیەی هاندەران دەکەم، کە لەگەڵ گەیشتنم بۆ پاریس لێیان کردم، بەخێرهاتنەکەم سەرسوڕهێنەر بوو ".
مێسی زیاتر گوتی " هەست بە دڵخۆشییەکی زۆر دەکەم کە لێرەم، ئەمە قۆناخێکی نوێی یارییکردنی من و کاروانی پیشەگەریمە ".
ئەستێرە ئەرجەنتینییەکە بە هاندەرانی یانەکەی گوت " هیوادارم پێکەوە کاتی خۆش بەسەرببەین و ئەم وەرزە ئاستێکی باش پێشکێشبکەم ".
لەلایەن خۆیەوە سێرخیۆ رامۆس، بەرگریکارە نوێیەکەی پاریس سانجێرمان گوتی " ئەمڕۆ رۆژێکی زۆر تایبەتە بۆ من، تیپێکی نایابمان هەیە کە دەتوانێت نازناو بباتەوە، کاردەکەین و هەموو توانایەکمان دەخەینەگەڕ بۆ ئەوەی ئاستێکی بەرز پێشکێشبکەین، هاندەران بە ئاستە بەرزەکەمان دڵخۆشبکەین، چونکە ئەمە شتێکی زۆر گرنگە ".
لە کۆتایی قسەکانیدا رامۆس بە یەک رستە گوتی " پاریس ئەفسووناوییە ".
لیۆنێل مێسی، لە گواستنەوەی ئەم هاوینەدا دوای زیاتر لە 16 ساڵ یارییکردن بۆ تیپی یەکەمی بارسێلۆنا، ماڵئاوایی لە یانەکە کرد و بەشێوەیەکی بێبەرامبەر بە مووچەی 35 ملیۆن یۆرۆ بۆ ماوەی دوو ساڵ پەیوەندیی بە ریزەکانی یانەی پاریس سانجێرمان کرد.
لیۆ لە یاریی پاریس و ستراسبۆرگ کە پاریسییەکان بە 4-2 یارییەکەیان بردەوە، لەنێو هاندەرانەوە لەگەڵ نەیمار، دیماریا، پاستۆری، سێرخیۆ رامۆس و خانەوادەکەی بینەری یارییەکە بوو.
سێرخیۆ رامۆسیش بەهەمان شێوەی مێسی بێبەرامبەر پەیوەندیی بە یانە فەرەنسییەکە کردووە، دوای ئەوەی گرێبەستەکەی لەگەڵ یانەی ریال مەدرید کۆتاییهات و لەسەر نوێکردنەوەی گرێبەستەکەی لەگەڵ یانەکە نەگەیشتە رێککەوتن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ