رووداو دیجیتاڵ
ئەمڕۆ لە خولی فەرەنسا، گرنگترین یاریی ئەم وەرزەی لیگ وەن ئەنجام دەدرێت، کاتێک پاریس سانجێرمانی یەکەمی خولەکە لەسەر یاریگەی پارک دی پرانس میوانداری لانس دەکات کە دووەمی ریزبەندییە و رکابەری راستەوخۆی یانەی پاریسییە.
یانەکەی پایتەخت 69 خاڵی هەیە و لانسیش 63 خاڵ، کەواتە بردنەوەی ئەم یارییە بە 6 خاڵە، چونکە پاریس بباتەوە جیاوازییەکە دەبێتە 9 خاڵ و پاریسییەکان تا راددەیەک دەتوانن بڵێن ئێمە پاڵەوانی لیگ وەنین، بەڵام ئەگەر لانس بباتەوە، جیاوازییەکە دەبێتە تەنیا 3 خاڵ و ئەوکات رکابەرییەکە زۆر تووند دەبێت.
پاریس سانجێرمان دوای ئەوەی لە چامپیۆنزلیگ دەرکرا و پێشتریش لە جامی فەرەنسا دەرکراوە، تەنیا خولی بەدەستەوە ماوە و بە هەر نرخێک بێت دەبێت بیباتەوە، چونکە بێجگە لە سەرکەوتن، لەوانەیە ئەو یانەیە کە پڕە لە ئەستێرەی جیهانی، لەسەرووشیانەوە لیۆنێل مێسی و کیلیان ئێمباپێ، رووبەڕووی تووڕەیی جەماوەرەکەی ببێتەوە و دەرئەنجامەکەش خراپ و نەخوازراو بێت.
ئەمڕۆ مێسی و ئێمباپێ بە بێ نەیمار کە بەدەست پێکانەوە دەناڵێنێت، هەوڵدەدەن گرنگترین یاریی ئەم وەرزەیان ببەنەوە و لانیکەم دڵی جەماوەرەکەیان و خۆشیان بە بردنەوەی نازناوی لیگ وەن خۆش بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ