ریال مەدرید
رووداو دیجیتاڵ
ئەمشەو دووەم یاریی قۆناخی پێشکۆتایی جامی سوپەری ئیسپانیا لە سعودیە بەڕێوەدەچێت و ریال مەدرید بۆ یارییەکە ئامادەیە.
یانەی شاهانە شەوی رابردوو، دوایین مەشقەکانی بۆ یارییەکەی ئەمشەوی بەرامبەر ریال مایۆرکا ئەنجامدا و چاوی لە بەدەستهێنانی چواردەیەم نازناوی پاڵەوانێتییەکەیە.
کارلۆ ئەنچێلۆتی و تیپەکەی وەکو پاڵەوانی ساڵی رابردوو چوونەتەوە سعودیە و دەیانەوێت بەبردنەوە لە مایۆرکا خۆیان بگەیێننە یاری کلاسیکۆ بۆ رکابەریکردنی بارسێلۆنا و یەکلاکردنەوەی نازناوی ئەمساڵی جامی سوپەری ئیسپانیا.
ریال مەدرید لەکاتێکدا ئەم یارییە ئەنجامدەدات، بەبردنەوەیەکی زەحمەت لە ڤالێنسیاوە هاتووە، ڤینیسیۆس لەکاتێکدا بەشداری لە یارییەکەی ئەمشەودا دەکات، بەهۆی وەرگرتنی کارتی سوور لە یاریی رابردووی لالیگادا بۆ دوو یاری راگیراوە، بۆیە لە جامەکەدا ئەستێرە بەرازیلییەکە دەیەوێت سەرکردایەتی تیپەکە بکات بۆ بردنەوەی یارییەکە و گەیشتن بە یاری کۆتایی.
یانەی ریال مایۆرکا، دوایین ئامادەکارییەکانی بۆ یارییەکەی بەرامبەر ریال مەدرید ئەنجامدا و چاوی لە ئەنجامدانی سوپرایزێکە بۆ گەیشتن بە یاری کۆتایی پاڵەوانێتییەکە.
مایۆرکا 73 یاریی بەرامبەر ریال مەدرید کردووە، تەنیا 16 یاریی لەو یانەیە بردووەتەوە دوایینجار کە لە یانەکەی بردبێتەوە ساڵی 2023 بوو.
مایۆرکا بۆ بەشداریکردن لە جامی سوپەری ئیسپانیا ملیۆنێک و 500 هەزار یۆرۆ وەردەگرێت، جگە لە بەشداریکردنێکی شەرەفمەندانە، یانەکە دەیەوێت رکابەرییەکی بەهێزی ریال مەدرید بکات بۆ ئەوەی خۆی بگەیێنێتە یاری کۆتایی.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ