ڤینیسیۆس جونیۆر
رووداو دیجیتاڵ
یانەی ریال مەدرید یارییە دواخراوەکەی لە یانەی ڤالێنسیا بردەوە و گەڕایەوە پێشەنگی ریزبەندی خولی ئیسپانیا، بەڵام ڤینیسیۆس جونیۆری لەدەستدا.
لە یاریگەی مێستایا و لە یارییەکی دواخراوی لالیگادا، ریال مەدرید بەرامبەر ڤالێنسیا یارییکرد، سەرەتا خاوەن یاریگە هێرشی زیاتری بردە سەر گۆڵی تیپی میوان، لە خولەکی 26 هوگۆ دورۆ گۆڵی پێشکەوتنی بۆ خاوەن یاریگە تۆمارکرد، نیوەی یەکەم بەو گۆڵە لە بەرژەوەندی ڤالێنسیا کۆتاییهات.
لە نیوەی دووەمدا، ریال مەدرید هەوڵەکانی بۆ یەکسانکردنەوەی ئەنجامەکە چڕکردەوە، کیلیان ئێمباپێ لێدانێکی سزای بەدەستهێنا، بەڵام جود بێلینگهام لە جێبەجێکردنیدا سەرکەوتوو نەبوو و لێدانەکەی لەدەستدا.
لە خولەکی 80 بەهۆی رووداوێکی دوور لە گیانی وەرزشی، ڤینیسیۆس جونیۆر بەکارتی سوور کرایە دەرەوە و ریال مەدرید بە 10 یاریزانەوە یارییکرد، بەڵام خۆی بەدەستەوە نەدا و لوکا مۆدریچ لە خولەکی 85 ئەنجامەکەی یەکسانکردەوە.
بەر لە کۆتاییهاتنی یارییەکە، بە سوود وەرگرتن لە هەڵەیەکی هێڵی بەرگری ڤالێنسیا، بێلینگهام لەدەستدانی لێدانە سزاکەی راستکردەوە و گۆڵی دووەمی تۆمارکرد، ریال مەدرید یارییەکەی بە دوو گۆڵ بەرامبەر گۆڵێک بردەوە و گەڕایەوە پێشەنگی ریزبەندی خولەکە.
کرانە دەرەوەی ڤینیسیۆس جونیۆر، لە یارییەکەدا بەکاتی سوور کاردانەوەی زۆری بەدوای خۆیدا هێنا و کارلۆ ئەنچێلۆتی، راهێنەری یانەی ریال مەدرید دەڵێت "پێموانییە ڤینیسیۆس شایستەی کارتی سوور بێت، بۆیە تانە لە بڕیارەکە دەدەین."
ناوبژیوانی یارییەکە لە راپۆرتەکەیدا لەبارەی یارییەکە نووسیوویەتی "ڤینیسیۆس لە گۆڵپارێزی تیپی بەرامبەری داوە، بەبێ ئەوەی تۆپ لە شوێنەکە بێت، بۆیە ئەوە رووداوێکە نابێت چاوپۆشی لێبکرێت."
راپۆرتە رۆژنامەڤانییەکانی ئیسپانیا باس لەوە دەکەن، ئەگەری هەیە ڤینی بەهۆی ئەو کارتە سوورەوە بۆ 4 یاری رابگیرێت، بەمەش بەشداری لە یارییەکەی ریال مەدرید بەرامبەر دیپۆرتیڤۆ مینێرا لە جامی شا، ریال مایۆرکا لە جامی سوپەر، یاری کۆتایی جامی سوپەر لە ئەگەری گەیشتنیان بەو قۆناخە و قۆناخی شازدەی جامی شا ناکات، بەڵام ئەگەر یانەکە نەگاتە هیچ یەکێک لەو قۆناخانە ئەوا سزاکەی دەگوازرێتەوە بۆ یارییەکانی لالیگا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ