رووداو دیجیتاڵ
لیۆنێل مێسی، بەهۆی ئامادە نەبوون لە یاریی ئینتەرمەیامی بەرامبەر هیوستن لە خولی ئەمریکیدا، کێشە بۆ ئەو یانە ئەمریکییە دروست دەکات و هاندەرانی ئامادەنین بچنە یاریگا. یانەی هیوستنیش داوایان لێدەکات بچنە یاریگا و بەڵێنیان پێدەدات قەرەبوویان بکاتەوە.
یانەی هیوستن دینامۆی ئەمریکی رایگەیاند، بلیتی یارییەکەی داهاتووی لە یاریگای خۆیان بەخۆڕایی دەدەنە هاندەرانی، دوای ئەوەی ئاشکرابوو کە لیۆنێل مێسی هێرشبەری یانەی ئینتەرمەیامی بەرەبەیانی سبەی بەشداری لە یارییەکەی هیوستن و ئینتەرمەیامی لە خولی ئەمریکیدا ناکات.
پێشتر ئامادەنەبوونی مێسی لە یارییەکاندا بووەتە هۆی قەرەبووکردنەوەی هاندەران، وەک ئەوەی رێکخەرانی یارییەک لە هۆنگ کۆنگ ساڵی رابردوو بڕی 50%ـی پارەی بلیتەکانیان بۆ هاندەران گەڕاندەوە، دوای ئەوەی یاریزانە ئەرجەنتینییەکە بەهۆی پێکانەوە لە یارییەکەدا نەکرد.
مانگی ئابی ساڵی رابردوو یانەی شیکاگۆ فایەر مەرجی ئەوەی لەسەر بلیتی یارییەکەیان بەرامبەر ئینتیەرمەیامی راگەیاند، کە ئەگەر لیۆنیل مێسی تووشی پێکان ببێت و لە یارییەکەی یانەکەیدا لە یاریگای خۆیاندا بەرامبەر ئینتەرمەیامی یاری نەکرد، پارەی کڕینی بلیتەکەیان بۆ دەگەڕێننەوە.
یانەی هیوستن لە بڵاوکراوەیەکی فەرمیدا، کە لە پێگەی خۆیدا بڵاویکردووەتەوە، دەڵێت "ئەو راپۆرتەی لەسەر دۆخی تەندروستی یاریزانانی ئینتەرمەیامی پێمان گەیشتووە ناوی لیۆنێل مێسی تێدا نییە، بەڵام بەپێی زانیارییەکان ئەو گەشتی بۆ هیوستن ئەنجام نەداوە، بەداخەوە ئەوە لە دەستی ئێمەدا نییە کە لە تیپی بەرامبەردا کێ بەرامبەرمان یاری دەکات".
ئاماژەی بەوەشکردووە "ئەو هاندەرانەی کە ئامادەی یارییەکەی بەرامبەر ئینتەرمەیامی دەکەن دەتوانن بلیتی یەکێک لە یارییەکانی یانەکەمان لەم وەرزەدا بەخۆڕایی وەربگرن، وردەکاری زیاتر لەو بارەوە لە سەرەتای هەفتەی داهاتوودا دەخەینەڕوو".
مێسی هەفتەی رابردوو لە یاریی جامی پاڵەوانانی کۆنکاکاف بەرامبەر سپۆرتینگ کانساس سیتی بەشداری کرد و گۆڵی یەکەمی ئینتەرمەیامی تۆمارکرد، کە بەئەنجامی 3-1 یارییەکەیان بردەوە.
یاریزانە ئەرجەنتینییە تەمەن 37 ساڵەکە لەلایەن بەرپرسانی خولی ئەمریکی بە بڕە پارەیەکی ئاشکرا نەکراو سزادرا، دوای ئەوەی لە سەرەتای ئەم مانگەدا ملی ئەندامێکی ستافی راهێنەرایەتی بەتووندی گرت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ