ئەلڤێش دەیەوێت لە زیندانەوە ریمۆنتادا بکات

 

 

دادگای ئیسپانیا دوو هەفتە لەمەوبەر بە تومەتی دەستدرێژیکردنە سەر کچێک بڕیاری گرتنی ئەلڤێشی دا و یاریزانەکە لە شاری بارسێلۆنا زیندانیکراوە و بەو هۆیەشەوە یانەی پوماسی مەکسیکی گرێبەستی یاریزانە بەرازیلییەکەی هەڵوەشاندەوە، بەڵام یاریزانەکە داوای قەرەبوو دەکات.

 

سەرۆکی یانەی پوماس لە دوای هەڵوەشاندنەوەی گرێبەستی ئەلڤێش گوتی " ئەوەی کراوە لەگەڵ یانەکە ناگونجێت و بەهیچ شێوەیەک لێی بەرپرس نین."، یانەکە بەبێ گەڕانەوە بۆ یاریزانەکە گرێبەستەکەی هەڵوەشاندەوە.

 

میدیای بەرازیل دەڵێت " لە بەرامبەر هەڵوەشاندنەوەی گرێبەستەکەی لەلایەن یانە مەکسیکیەکەوە، دانی ئەلڤێش داوای 4.5 ملیۆن یۆرۆ لە یانەکە دەکات، بەهۆی ئەوەی بەبێ گەڕانەوە بۆ یاریزانەکە گرێبەستەکەیان هەڵوەشاندووەتەوە."

 

بەپێی گرێبەستی نێوان هەردوولا، دانی ئەلڤێش بەندەکانی گرێبەستی نێوانیان پێشێلکردووە، بۆیەش یانەکە بە پشتبەستن بە یاساکانی وڵاتەکەی گرێبەستەکەی نێوانیان هەڵوەشاندووەتەوە.

 

ئەلڤێش تاوەکو ئێستا لە زینداندایە و داهاتووی بەتەواوی دیار نییە تاوەکو دادگاییکردنەکەی بەڕێوەدەچێت.