رووداو دیجیتاڵ
ئەمشەو یاریی گەڕانەوەی قۆناخی پێشکۆتایی جامی شای ئیسپانیا لەنێوان هەردوو یانەی ریال مەدرید و ریال سۆسیداد بەڕێوەدەچێت و ریال مەدرید قاچێکی لە یاریی کۆتایی پاڵەوانێتییەکەیە.
یاریی گەڕانەوەی نێوان هەردوو یانە لە یاریگەی سانتیاگۆ بێرنابیۆ دەکرێت، ریال مەدرید یاریی چوونی بە گۆڵێکی ئێندریک بردووەتەوە و دەیەوێت رێگەی گەیشتنی بە یاریی کۆتایی پاڵەوانێتییەکە لە نێو یاریگە و هاندەرانیدا تەواو بکات.
رۆژی دووشەممە یانەی شاهانە دوایین مەشق و راهێنانەکانی بۆ یارییەکە ئەنجامدا و تیپەکە ئامادەیە بۆ یاریی ئەمشەو.
تیبۆ کۆرتوا هاوشێوەی یاریی رابردووی یانەکە بەرامبەر یانەی لیگانێس، بەهۆی پێکانەوە بەشداری لەم یارییەشدا ناکات و دیارنییە بەتەواوی کەی دەگەڕێتەوە نێو یاریگەکان.
بەپێی راپۆرتە رۆژنامەڤانییەکانی مەدرید، ئەگەری هەیە ئەمشەو دەیڤد ئالابا و راول ئاسێنسیۆ لە دڵی بەرگریدا بەشێوەی سەرەکی یاری بکەن، فێدریکۆ ڤالڤێردی لە باڵی راستی بەرگری دەبێت و لە هێڵی پێشەوەش چاوەڕواندەکرێت ڤینیسیۆس، ئێندریک و ئێمباپێ بەشێوەی سەرەکی بەشداری لە یارییەکەدا بکەن.
ریال سۆسیداد لە دوایین چوار یارییدا بەرامبەر ریال مەدرید دۆڕاوە و تەنیا یەک گۆڵی کردووە، ئەمشەو سەرەڕای ئەوەی لە دەرەوەی یاریگەی خۆی یاری دەکات، دەیەوێت هەلی گەیشتن بە یاریی کۆتایی پاڵەوانێتییەکە لەدەست نەدات.
براوەی یاریی ئەمشەوی نێوان هەردوو یانە لە یاریی کۆتاییدا لە یاریگەی لاکارتۆخای یانەی سێڤییا رکابەری براوەی یاریی نێوان بارسێلۆنا و ئاتلێتیکۆ مەدرید یاری دەکات.
ریال مەدرید و ریال سۆسیداد لە رکابەرییەکانی جامی شادا، 20 یارییان بەرامبەر یەکدی کردووە، ریال مەدرید 10 بردنەوە، ریال سۆسیداد 9 بردنەوە، یارییەکیش بەیەکسانبوون کۆتاییهاتووە.
لە دوایین 6 یاریی قۆناخی کرانە دەرەوەدا لە جامی شای ئیسپانیا، ریال سۆسیداد 3 جار ریال مەدریدی کردووەتە دەرەوە.
دوایینجار کە ریال مەدرید بەرامبەر ریال سۆسیداد سەرکەوتبێت، بەلێدانەکانی یەکلاکەرەوە بوو لە 1982 و لە 1993.
یەکێک لە گەورەترین یارییە مێژووییەکانی ریال سۆسیداد بەرامبەر ریال مەدرید، لە قۆناخی پێشکۆتایی جامی شای ئیسپانیا بووە لە 1988، کاتێک لە یاریی چووندا بە 1-0 یارییەکەیان بردەوە و لە یاریی گەڕانەوەدا لە بێرنابیۆ 4-0 بردنەوەکەیان دووبارەکردەوە، بەڵام لە یاریی کۆتاییدا هەر لە بێرنابیۆ بە بارسێلۆنا دۆڕان و نەبوونە پاڵەوان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ