مریشکی برژاو

لە بەرنامەی ئەمڕۆی "شیڤ و شیرینی"، دروستکردنی خواردنێکی تەندروست پێشکەش دەکرێت. ئەم خواردنە لە مریشکی برژاو، پەتاتە و گێزەری بەتامکراو و، خواردنەوەی میوەیی پێکهاتووە.
 
پێکهاتەکان: مریشک، زەیت، سۆسی باربیکیو، سرکەی هەنار، ئاوی لیمۆ، حەوت بەهارات، ڤیجیتا، خوێ، سێو یان هەرمێ (بۆ ناو مریشکەکە)
پێکهاتەکانی سەوزە: پەتاتە بە توێکڵەوە، گێزەر، دەرمانی تاکۆ، زەیتی زەیتوون، سیر، کەرەوز
پێکهاتەکانی مۆهیتۆی شلک (سترۆبێری): شلک، لیمۆ، گیراوەی غازی

شێوازی ئامادەکردنی مریشکەکە
مریشکەکە دەشۆرێتەوە و ئامادە دەکرێت بۆ برژاندن. سۆسێک لە زەیت، سۆسی باربیکیو، سرکەی هەنار، ئاوی لیمۆ، بەهارات، ڤیجیتا و خوێ دروست دەکرێت. مریشکەکە بە سۆسەکە بەباشی مەساج دەدرێت بۆ ئەوەی هەموو بەشەکانی وەریبگرێت. پاشان سێو یان هەرمێ یان لیمۆ دەخرێتە ناو سکی مریشکەکەوە. قاچەکانی مریشکەکە دەبەسترێنەوە و بە کاغەزی زەیتی دادەپۆشرێت، پاشان بە ئەلەمنیۆم دادەپۆشرێت. مریشکەکە دەخرێتە ناو فڕنەوە لە پلەی گەرمی 200 لە ناوەڕاستی فڕنەکەدا دادەنرێت.

شێوازی ئامادەکردنی سەوزە
پەتاتە و گێزەر بە توێکڵەوە دەشۆرێنەوە و پاک دەکرێنەوە. توێکڵی پەتاتە بەهۆی ئەوەی ڤیتامینی زۆری تێدایە، لێناکرێتەوە. گێزەر بە دوو کەرت دەکرێت، بەڵام زۆر ورد ناکرێت. دەرمانی تاکۆ، زەیتی زەیتوون، سیر و کەرەوز تێکەڵ دەکرێن و بەسەر پەتاتە و گێزەرەکە دا دەکرێن. ئەوانیش دەخرێنە ناو فڕنەوە بۆ برژاندن.

شێوازی ئامادەکردنی مۆهیتۆی شلک
موهیتۆیەکی سادە بە تامی شلک (سترۆبێری) دروست دەکرێت. شلک لە ناو پەرداخێکدا بە کەوچکێک پان دەکرێتەوە. لیمۆی تازە دەخرێتە سەری و گیراوەی غازی تێدەدرێت.

پێشکەشکردن
خواردنەکە بە شێوەیەکی رێکوپێک و جوان دادەنرێت. مریشکەکە لە ناوەڕاستی قاپێک دادەنرێت، سەوزە و میوەکان دەخرێنە دەوروبەری مریشکەکە. تۆزێک خەیاریش لەگەڵی دادەنرێت. موهیتۆی شلکیش لەگەڵیدا پێشکەش دەکرێت.
ئەم خواردنە تەندروستە و ئاسانە بۆ دروستکردن. هاوکات چێژێکی تایبەتیش بە خواردنەکە دەدرێت لەڕێگەی بەکارهێنانی بەهاراتی جیاواز و شێوازی برژاندنەکە.

رۆژانە لە مانگی رەمەزان کاژێر 17:30