ڕێپێوانی بەرەنگاربوونەوەی پلاستیک لە باکووری کوردستان
رووداو دیجیتاڵ
رێپێوانێک لە شاری قەرسی باکووری کوردستان بۆ شاری ئەدیرنەی تورکیا بە ناونیشانی (نا بۆ تیرۆری پلاستیک) دەستیپێکرد کە مەودای نێوان ئەو دوو شارە هەزار و 800 کیلۆمەتر دەبێت. بەدرێژایی رێگەکە پلاستیک و خاشاک کۆدەکرێنەوە.
ماوەی 12 رۆژە رێپێوانەکە بەردەوامە و فیدراسیۆنی نێودەوڵەتیی نوێنەرانی ئاو سەرپەرشتی ئەو چالاکییە دەکەن.
ئۆزگور ئایدنجاک، سەرۆکی فیدراسیۆنی نێودەوڵەتی نوێنەرانی ئاو لەبارەی چالاکییەکەوە دەڵێت، "لە تەواوی رێپێوانەکەماندا، ئەگەر ئێمە تەواوی پلاستیکی سەر رێگەکانمان کۆبکردایەتەوە، بڕوابکەن تەنیا لە لای راستی شەقامەکاندا نزیکەی 20 بۆ 22 بارهەڵگر پلاستیک کۆدەکرایەوە. بە لای چەپی شەقامەکانەوە [بە قەبارەی] نزیکەی 40 بارهەڵگر پلاستیک هەبوو."
وەکو فدراسیۆنەکە باسی دەکات، "گەورەترین هەڕەشە پلاستیکە" و ئەگەر رێگە لە بڵاوبوونەوەی نەگیرێت، ئەنجامەکەی "خراپ و مەترسیدار" دەبێت.
ئۆزگور ئایدنجاک دەڵێت، "ئەو شوێنانەی پلاستیکی لێ کۆدەکەینەوە، نزیکن لە چەم و رووبار و زەویی کشتوکاڵی. پلاستیک لەژێر تینی هەتاو دەتوێتەوە و لەگەڵ ئاو دەچێتە ژێر خاکە کشتوکاڵییەکان. دواتر ئەوانەش دەبنە خۆراک و دەگەڕێتەوە جەستەی مرۆڤ. دەرەنجامەکەشی زیادبوونی نەخۆشییەکانی ئۆبێزیت، ئۆتیزم و شێرپەنجەیە."
بە گوتەی پسپۆرانی فیدراسیۆنەکە، دەریای رەش و زەریای هێمن سێ هێندەی رووبەری تورکیا پلاستیکیان لێ کەڵەکە بووە و ئەمە هەڕەشەیە بۆ سەر ژیانی مرۆڤ و گیانلەبەران.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ