رووداو دیجیتاڵ
شەپۆلێکی دیکەی خۆڵبارین روو لە عێراق دەکات و کەشناسێکی عێراقی ئامۆژگاری هاووڵاتییان دەکات گەشتی وشکانی نەکەن؛ بەرپرسێکی کەشناسی هەرێمی کوردستانیش دەڵێ، خۆڵبارینەکە کاریگەریی بۆ سەر هەندێک ناوچەی هەرێمی کوردستان دەبێت.
رۆژی شەممە 09-07-2022، ئاسۆ کەمال، بەڕێوەبەری کەشناسی و بوومەلەرزەزانی سلێمانی بە تۆڕی میدیایی رووداوی راگەیاند، ئەو شەپۆلە خۆڵبارینەی کە چاوەڕوان دەکرێت یەکشەممە ناوچەکانی ناوەڕاست و باشووری عێراق بگرێتەوە، بەشێوەیەکی سنوودار کاریگەریشی بۆسەر بەشێک لە ناوچەکانی ئیدارەی گەرمیان و کەرکووک دەبێت، تەپ و تۆز و خۆڵبارین دروستدەکات، بەڵام کاریگەریی زۆری بۆ سەر ناوچەکانی باشوور و ناوەڕاستی عێراق دەبێت.
سەبارەت بە پلەی گەرما، بەڕێوەبەری کەشناسی و بوومەلەرزەزانی سلێمانی گوتی، بەشێوەیەکی گشتیی پلەی گەرمای رۆژی یەکشەممە هاوشێوەی رۆژی شەممە دەبێت، بەڵام رۆژی دووشەممە تاڕادەیەک پلەی گەرما نزم دەبێتەوە.
رۆژی شەممە 09-07-2022، سادق عەتییە، پێشبینیکاری کەشوهەوا رایگەیاند، چاوەڕوان دەکرێت خۆڵبارینێکی مامناوەند باشووری نەینەوا، واست، میسان، رۆژئاوای بەسرە، رۆژئاوای زیقار، بگرێتەوە و خۆڵبارینەکە بەیانی رۆژی یەکشەممە روودەکاتە باشووری نەینەوا و بەرەو سەلاحەددین و دواتر بەغدا، لە مامناوەندەوە دەبێتە خۆڵبارینێکی چڕ.
سادق عەتییە ئاماژەی بەوەش کرد، خۆڵبارینەکە شەوی یەکشەممە زیاتر دەبێت تاوەکو بەیانی رۆژی دووشەممە لە ناوچەکانی نەینەوا، سەلاحەددین، ئەنبار، دیالە، واست، بەغدا، شارەکانی باشوور و فوراتی ناوەڕاست. هاوکات ئامۆژگاریی هاووڵاتییان دەکات شەوی یەکشەممە لەسەر دووشەممە و بەیانی رۆژی دووشەممە بە رێگەی وشکانی گەشت نەکەن، تاوەکو خۆڵبارینەکە تەواو دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ