رووداو دیجیتاڵ
گوتەبێژی وەزارەتی ئەوقاف و کاروباری ئایینیی هەرێمی کوردستان دەڵێت، حاجییەکی کورد کە دانیشتووی ئیدارەی سەربەخۆی راپەڕینە، لە مەککە کۆچی دواییکرد.
رۆژی سێشەممە، 20-06-2023، نەبەز ئیسماعیل، گوتەبێژی وەزارەتی ئەوقاف و کاروباری ئایینیی هەرێمی کوردستان بە تۆڕی میدیایی رووداوی گوت: "ئەو حاجییە ناوی رەحیمە قادر حەسەنە و لە دایکبووی 1957 بووە و دانیشتووی ئیدارەی سەربەخۆی راپەڕینە."
بەگوتەی نەبەز ئیسماعیل، ئەو حاجییە نەخۆشیی دڵی هەبووە و لە سلێمانی قەستەرەی بۆ کراوە، بەڵام ئەمڕۆ تەندروستیی تێکچووە، تیمەکانی تەندروستیی حاجییانی هەرێمی کوردستان ئەوەی پێویست بووە کردوویانە و هەر ئەو کات گەیێندراوەتە نەخۆشخانەی مەلیک عەبدولعەزیز، بەڵام بە جەڵتەی دڵ گیانی لەدەستداوە.
گوتەبێژی وەزارەتی ئەوقاف و کاروباری ئایینی گوتی، ئەو حاجییەی گیانی لەدەستداوە کوڕەکەی و تیمەکانی وەزارەتیشی لەگەڵدایە و بڕیارە هەر لەوێ بنێژرێت.
رۆژی دووشەممە، 19-06-2023، حاجییەکی دیکە بە ناوی ئەختەر ئەحمەد کە دانیشتووی هەڵەبجەی تازەیە و لە دایکبووی 1955ـە، تەندروستی تێکدەچێت و جەڵتەی مێشک لێیداوە و راستەوخۆ نەشتەرگەریی مێشکی بۆ کرا. لەبارەی تەندروستیی ئەختەر ئەحمەد، گوتەبێژی وەزارەتی ئەوقافی هەرێمی کوردستان گوتی: "تەندروستی ئەو حاجییەش زۆر زۆر خراپە."
یەکەم زیارەتی هاونیشتمانییان بۆ سعودیە 9ـی ئەم مانگە بە رێگەی وشکانی دەستیپێکرد؛ گەشتی ئاسمانیش لە 12ـی ئەم مانگە لە فڕۆکەخانەکانی هەولێر و سلێمانییەوە دەستیپێکرد. تێچووی حەجی ئەمساڵ بە رێگەی ئاسمانی 4 هەزار و 500 دۆلارە و بە رێگەی وشکانیش 3 هەزار و 800 دۆلارە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ