رووداو دیجیتاڵ
بەهۆی بارانی بەخوڕ، لافاو دەچێتە نێو هۆڵەکانی فڕۆکەخانەی نێودەوڵەتیی بەیرووتەوە و گەشتیاران بە پێ بەنێو ئاودا دەڕۆن و چێشتخانەکانیش کەلوپەلەکانیان هەڵدەگرنەوە.
ئەمڕۆ سێشەممە، 12ی کانوونی یەکەمی 2023 لە هۆڵی رەفیق حەریریی نێو فڕۆکەخانەی نێودەوڵەتیی بەیرووتدا، بەهۆی بارانی بەخوڕەوە کێشە بۆ گەشتیاران و خەڵکی نێو فڕۆکەخانەکە دروست بووە.
بەپێی ئەو ڤیدیۆیانەی بڵاوکراونەتەوە، بارانە بەخوڕەکە چووەتە نێو هۆڵی رەفیق حەریری و چێشتخانەکانی نزیک ئەو هۆڵە کورسی و مێزەکانیان هەڵگرتووە تاوەکو تووشی زیانی مادی نەبن. کەشناسیی لوبنان هۆشداری داوە کە کەشوهەوا ئاسایی نییە و کاریگەریی نەرێنی لەسەر لوبنان و ناوچەکە دروست دەکات.
کەشناسیی لوبنان دەشڵێت، ئەم باوبۆرانەی لە ئەمڕۆوە دەستی پێکردووە و تاوەکو بەیانیی رۆژی پێنجشەممە بەردەوام دەبێت.
بارانە بەخوڕەکە رەشەبایشی لەگەڵە کە خێرایی بایەکە دەگاتە 60کیلۆمەتر لە کاژێرێکدا.
بە ڤیدیۆ؛ ئاو چووەتە نێو فڕۆکەخانەی رەفیق حەریری لە بەیروت pic.twitter.com/SJokkqHrts
— Rudaw (@Rudawkurdish) December 12, 2023
فڕۆکەخانەی نێودەوڵەتیی بەیرووت، یان فڕۆکەخانەی نێودەوڵەتیی رەفیق حەریری، رووبەری 9 کیلۆمەترە، دەکەوێتە نێوەڕاستی بەیرووتی پایتەختی لوبنانەوە. فڕۆکەخانەکە تاکە فڕۆکەخانەی بازرگانیی لوبنانە و هەروەها بنکەی سەرەکیی هێڵی ئاسمانیی لوبنانییە. پێشتر بە ناوی فڕۆکەخانەی نێودەوڵەتیی بەیرووت دەناسرا، بەڵام لە ساڵی 2005ـەوە بەڕێوەبەرایەتیی گشتیی هێڵەئاسمانییەکانی لوبنان، گۆڕیویانە بە فڕۆکەخانەی نێودەوڵەتیی رەفیق حەریری.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ