رێژین رەئووف، بەڕێوەبەری گشتوگوزاری دووکان.
رووداو دیجیتاڵ
بەڕێوەبەری گشتوگوزاری دووکان دەڵێت، ئامادەکاریی تەواویان بۆ پێشوازیکردن لە گەشتیارانی رۆژانی جەژن کردووە؛ گوتیشی، ''سەرجەم پڕۆژە گەشتیارییەکان داواکاریی پێشوەختەیان لەسەرە.''
ئەمڕۆ یەکشەممە 30-03-2025، رێژین رەئووف، بەرێوەبەری گەشتوگوزاری دووکان لەکاتی بەشداریکردنی لە بووڵتەنی کاژێر 10:00ـی تۆڕی میدیایی رووداو کە ئارێز خالید پێشکێشیکرد، لەبارەی ئامادەکارییەکان بۆ پێشوازیکردن لە گەشتیارانی رۆژانی جەژن رایگەیاند، ''لە تەواوی شوێنە گەشتیارییەکانی سنووری قەزاکە ئامادەکاریی تەواومان کردووە، سەرجەم پڕۆژەکانمان بۆ پێشوازیکردن لە گەشتیاران ئامادەن.''
رێژین رەئووف پێشبینی دەکات لە بەیانییەوە رێژەیەکی باش لە گەشتیاران لە خواروو و نێوەڕاستی عێراق و تەواوی ناوچەکانی دیکەی هەرێمی کوردستان روو بکەنە سنووری قەزاکە.
بەڕێوەبەری گەشتوگوزاری دووکان ئەوەشی خستەڕوو، ''بەپێی ئەو بەدواداچوونانەی کە کردوومانە، پڕۆژە گەشتیارییەکان داواکاریی پێشوەختەیان لەسەرە، بۆیە پێشبینی دەکەین رێژەیەکی باش لە گەشتیاران بێنە سنوورەکە.''
بەگوتەی رێژین رەئووف، بەروارد بە ساڵانی پێشوو، رێژەی کەپر و شوێنە گەشتیارییەکانی قەزای دووکان زیادیکردووە و توانای لەخۆگرتنی گەشتیارێکی زیاتریان هەیە، ''بەڵام لەوانەیە بۆ دووەم رۆژ و سێیەم رۆژی جەژن، وەک پێویست شوێن نەمێنێت لە ژێر کەپر، کابین و هۆتێلەکان.''
باسی لەوەش کرد، ''جیا لە کەپر و کابینەکان، سرووشتی دووکان، سەیرانگەکانی و ئەو رووبەرە فراوانەی لەسەر دەریاچەکە هەیە، توانای لەخۆگرتنی رێژەیەکی باش لە گەشتیارانیان هەیە.''
بەڕێوەبەری گەشتوگوزاری دووکان ئاماژەی بەوە دا، لە رۆژانی جەژنی رەمەزاندا گەشتیاران زیاتر لە خواروو و نێوەڕاستی عێراق، ئێران و دەرەوەی وڵات سەردانی شوێنە گەشتیارییەکانی قەزاکە دەکەن.
رێژین رەئووف ئاماژەی بەوەش کرد، لیژنەی پشکنینی بەڕێوەبەرایەتییەکە و لیژنەی ئابووریی قایمقامیەتی دووکان، لە رۆژانی جەژندا بۆ وەرگرتنی هەر رەخنە و گلەییەکی گەشتیاران، لە شوێنە گەشتیارییەکان ئامادە دەبن و بەدواداچوون بۆ نرخی کەپر، هۆتێل و کۆنترۆڵکردنیان دەکەن.''
لەبارەی تێچووی مانەوەی گەشتیاران لە کەپرە گەشتیارییەکان و هۆتێلەکانی قەزاکەش گوتی، ''نرخی شوێنەکان لە دووکان، ئەگەر لە ناوچەکانی دیکە هەرزانتر نەبێت، گرانتر نییە، بەڵام لە هەموو شوێنێک لە بۆنەکاندا، رێژەیەک لە نرخەکان بەرز دەبنەوە کە ئێمە رێگەمان نەداوە ئەو رێژەیە لە دووکان زێدەڕۆیی و سەرپێچی (ئیستغلالکردن)ـی تێدا بکرێت.''
بەگوێرەی دەستەی گەشتوگوزار، جەژنی رەمەزانی پار، زیاتر لە 203 هەزار گەشتیار هاتبوونە هەرێمی کوردستان. بەدواداچونێکی تۆڕی میدیایی رووداو دەریدەخات، لایەنە پەیوەندیدارەکانی هەرێمی کوردستان بۆ جەژنی رەمەزانی ئەمساڵ پێشبینیی هاتنی نزیکەی 200 هەزار گەشتیار دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ