رووداو دیجیتاڵ
مەزڵووم عەبدی دەڵێت، تورکیا هێزی زیاتری بردووەتە سەر سنوور و داوا لە ئەمریکا دەکات هەڵوێستێکی "بەهێزتری" هەبێت و رێگری لە هێرشیی زەمینیی تورکیا بکات، چونکە بە گوتەی خۆی، ئەنقەرە دەیەوێت بەڕێوەبەرایەتیی خۆسەر "لەنێوببات."
رۆژی سێشەممە 29-11-2022، لە ڤیدیۆ کۆنفرانسێکی رۆژنامەڤانیدا کە رووداویش تێیدا بەشداربوو، فەرماندەی گشتیی هێزەکانی سووریای دیموکرات - هەسەدە گوتی، تورکیا هێزی بردووەتە سەر سنووری ئەو ناوچانەی سووریا و رۆژئاوای کوردستان کە لە لایەن ئەنقەرە و گرووپە چەکدارە سوورییە نزیکەکانیەوە کۆنترۆڵکراون. ئەوە لە کاتێکدایە، بەرپرسانی تورکیا دەڵێن، تەنیا چەند رۆژێکی کەمیان پێویستە بۆ ئەوەی دەست بە لەشکرکێشییەکی نوێ بکەن بۆ سەر ناوچەکانی ژێر دەسەڵاتی بەڕێوەبەرایەتیی خۆسەر.
مەزڵوم کۆبانێ لەو بارەیەوە گوتی: "دەوڵەتی تورک لە ناوچەکانی سەر سنووری باکوورمان لە نزیک کۆبانێ و منبەج و ئەو شوێنانە، هێزەکانی کۆکردووەتەوە؛ هەروەها هێزەکانی لە نێوان [شاری] باب و منبەج زیادکردووە. لە ناوچەی ئەعزازیش بە هەمان شێوە لە بەرامبەر ناوچەی تل رەفعەت [تورکیا] هێزەکانی کۆکردوونەتەوە. ئێمە کۆکردنەوەی هێز لە لایەن تورکیا لەو ناوچانە بە جیدی وەردەگرین و رێکاری سەربازیی خۆمان دەگرینەبەر."
"هیچ مەرجێکمان بۆ وەستاندنی هێرشەکانی تورکیا بەدەست نەگەیشتووە"
فەرماندەی گشتیی هەسەدە رەتیکردەوە، هیچ لایەنێک مەرجەکانی تورکیای پێ گەیاندبن بۆ وەستاندنی هێرشەکان. ئەوە لە کاتێکدایە کە رۆژی دووشەممە 28-11-2022، سیامەند عەلی، گوتەبێژی هێزەکانی سووریای دیموکرات - هەسەدە بە میدیای ئەمریکی گوت، ئەلێکساندەر چایکۆ، فەرماندەی هێزەکانی رووسیا لە سووریا رۆژی یەکشەممە لەگەڵ فەرماندەی گشتیی هەسەدە کۆبووەتەوە. میدیای عەرەبیش لە زاری گوتەبێژەکەی هەسەدە بڵاویکردەوە کە فەرماندە رووسیەکە مەرجەکانی تورکیا بۆ وەستاندنی شەڕی خستوونەتە بەردەم مەزڵووم عەبدی.
لەو بارەیەوە، فەرماندەی هەسەدە گوتی: "بڕوام وایە قسەکانی گوتەبێژی هەسەدە بەهەڵە لێی تێگەییشتوون. ئەو شتەی تاوەکو ئێستا ئێمە لەگەڵ لایەنەکان گفتوگۆی لەسەر دەکەین، پابەندبوونە بەو رێککەوتن و لێکتێگەییشتنانەی لەگەڵ تورکیادا کراون. لەسەر ئەم مژارانە لەگەڵ هەموو کەسێک قسە دەکەین. ئێمە بە هەموو لایەکمان گوتووە کە پابەندین بەو رێککەوتنانەی لە نێوان تورکیا و رووسیا یان تورکیا و ئەمریکا واژۆکراون و داوا لە تورکیاش دەکەین پێیانەوە پابەند بێت. جگە لەوە هیچ مەرجێکمان بۆ نەهاتووە."
سەردانی فەرماندە رووسییەکە بۆ لای مەزڵووم عەبدی چەند رۆژێک دوای ئەوە هات کە رەجەب تەیب ئەردۆغان، سەرۆککۆماری تورکیا بەڵێنیدا فەرمان بە لەشکرکێشیێکی نوێ بۆ سەر ناوچەکانی ژێر دەسەڵاتی بەڕێوەبەرایەتیی خۆسەر بکات، دوای ئەوەی کە یەپەگە و پەکەکەی بە ئەنجامدانی تەقینەوەکەی 13ی نۆڤەمبەری ئیستەنبووڵ تۆمەتبارکرد؛ تۆمەتێک کە شەڕڤان و گەریلاکان رەتیدەکەنەوە.
رووسیا پێشتر داوای کردبوو گرژییەکان کەمبکرێنەوە و تورکیا خۆی لە ئەنجامدانی لەشکرکێشیی نوێ بەدووربگرێت.
لە وەڵامی ئەوەی کە ئایا فەرماندە رووسیەکە داوای لێ کردووە هیچ سازشێک بۆ تورکیا بکات، مەزڵووم عەبدی گوتی: فەرماندەکە "هیچ داوایەکی لە ئێمە نەکرد. ئێمە داوامان لەو کرد کە ئەم هێرشانەی تورکیا بووەستێنن،" هەروەها روونیشیکردەوە: "ئەو مژارەی کە گفتوگۆمان لەسەری کرد، پابەندبوون بوو بە رێککەوتنی سۆچی کە لە ساڵی 2019 لە نێوان سەرۆک پووتین و سەرۆکی تورکیا ئەردۆغان دروستکرا. ئەوەی کە ئێمە داوای دەکەین ئەوەیە هەموو لایەنەکان بە رێککەوتنەکەوە پابەند بن. پێشتر ئێمە گوتمان ئێمە ئامادەین بە رێککەوتنەکەوە پابەند بین، بەڵام پێویستە تورکەکانیش پابەند بن دوای ئەوەی کە ناوچەی کەمکردنەوەی گرژییەکان پێکهێندرا."
جێگیرکردنی سوپای سووریا لە ناوچەکانی ژێر کۆنتڕۆڵی بەڕێوەبەرایەتیی خۆسەر
مەزڵووم عەبدی باسی لەوە کرد کە هێزی حکومەتی سووریا "کە لەم کاتەدا لەسەر بنەمای رێککەوتنی ساڵی 2019 لەسەر سنوور"ی بەشێک لە ناوچەکانی ژێر دەسەڵاتی بەڕێوەبەرایەتیی خۆسەر بڵاوکراوەتەوە، "هێزێکی گەورەیە، [بەڵام] هێزەکانی ئێمە زیاترن."
رۆژی دووشەممە، میدیای عەرەبی باسی لەوە کرد، ئەلێکساندەر چایکۆ پێشنیازی کردووە بۆ فەرماندەی هەسەدە کە هێزەکانی حکومەتی سووریا لە ناوچەکانی ژێر دەسەڵاتی هەسەدە جێگیر بکرێن. لەو بارەیەوە مەزڵووم عەبدی گوتی: "بۆ ئێمە کێشە نییە ئەگەر هێزەکانی ئەوان [حکومەتی دیمەشق] زیاتر بن. بڕوام وایە ئەمە هێزێکی کاتییە و بۆ ئەوەیە پیشانی هەموو لایەکی بدەن سنوور بە فەرمی لە دەستی سوپای سووریادایە."
مەزڵووم عەبدی راشیگەیاند، ئەگەر دامەزراوەکانی حکومەتی سووریا بیانەوێت بگەڕێنەوە ناوچەکانی ژێر دەسەڵاتی بەڕێوەبەرایەتیی خۆسەر، پێویستی بە رێککەوتنی نێوان قامشلۆ و دیمەشق دەبێت، چونکە "ئەمە بڕیارێکە بە چارەسەری سیاسییەوە بەستراوەتەوە."
هێرشەکانی تورکیا و مەترسی سەر کامپەکان
فەرماندەی گشتیی هەسەدە ئاماژەی بەوە کرد کە ئەمریکا و رووسیا دووپاتیان کردووەتەوە کە ئەوان دژی هێرشی زەمینیی تورکیان بۆ سەر بەڕێوەبەرایەتیی خۆسەر، بەڵام گوتی، پێویستە "هەڵوێستێکی بەهێزتریان هەبێت بۆ ئەوەی کاریگەرییان هەبێت و رێگری لە هێرشەکە بکرێت."
مەزڵووم عەبدی گوتی: "ئێستا ئەوان [تورکیا] هەموو لایەنەکان تاقیدەکەنەوە، بە تایبەتی هێزەکانی ئەمریکا و رووسیا. ئەگەر هەڵوێستێکی لاواز لەم هێزانەوە ببینن، ئەوا لە ماوەیەکی کورتدا هێرش دەکەن. لە رووی سەربازییەوە ئەگەر بیەوێت، هەفتەیەکی دیکە هێرش دەکات، بەڵام ئەگەر ئەم وڵاتانە هەڵوێستیان تووند بێت، بڕوام وایە ناتوانێت هێرش بکات."
مەزڵووم عەبدی هەروەها هۆشداریشیدا ئەگەر هێرشەکە بکرێت، هەموو ئەو دەستکەوتانەی هەسەدە بە هاوبەشی لەگەڵ کۆمەڵگەی نێودەوڵەتی لە "شەری دژی تیرۆر" بەدەستیانهێناوە، لەنێودەچن و گوتی، "لانیکەم یەک ملیۆن کەس ئاوارە دەبن" و ئەو زیندان و کامپانەشی دەستگیرکراوانی داعشیان تێدایە، دەکەونە مەترسییەوە، چونکە "دۆخی ئەمنیی ناوەندەکان و کامپەکانی [چاودێریکردنی دەستبەسەرکراوان] باش نییە. دۆخی ئەمنیی کامپی هۆل زۆر باش نییە، چونکە بینیمان تورکیا هێرشی ئاسمانیی کردە سەر ناوەندەکانی دەستبەسەرکردن؛ هەروەها تورکیا ئاساییشی کامپی هۆلی بۆردوومانکرد کە بووە هۆی کوژرانی هەشت ئەندامی ئاساییش و برینداربوونی 15ی دیکە."
فەرماندەی گشتیی هەسەدە ئاماژەی بەوە کرد: "مەترسیی دروستبوونی یاخیبوون لە نێو زیندان و کامپەکاندا هەیە و بۆ ئەوەی بتوانین بە باشی ئاساییشی ئەو شوێنانە بپارێزین، پێوستە ئەم هێرشانە[ی تورکیا] بووەستێندرێن."
مەزڵووم عەبدی روونیکردەوە کە ئەگەر داعش هێرشێکی هاوشێوەی 20ی کانوونی دووەمی ئەمساڵ کە کردیە سەر زیندانی غوێران لە حەسەکە دووبارە بکاتەوە، "ئەوا هەسەدە ناتوانێت بە هەمان هێزی ئەو کات شەڕ بکات، چونکە ئەوان "ئێستا بە هێرشەکانی تورکیاوە سەرقاڵن" کە بە گوتەی خۆی بوونەتە هەڕەشە بۆ سەر "پێکەوەکارکردنی هەسەدە لەگەڵ کۆمەڵگەی نێودەوڵەتی" لە شەڕی دژی داعش.
بە گوتەی مەزڵووم عەبدی، "تاوەکو ئێستاش فڕۆکە و درۆنەکانی دەوڵەتی تورک بەسەر زیندانەکان و کامپی هۆلدا دەسوڕێنەوە."
مەزڵووم عەبدی هاوکات جەختیکردەوە کە تورکیا هەر هێرشێکی زەمینی بکات، هەسەدە ئامادەیە بەرپەرچی بداتەوە و شکستی پێ بهێنێت و لە ئەگەری لەو شێوەیەدا، "شەڕێکی گەورە و بەرفراوان هەموو سنوور دەگرێتەوە."
"هیچ پەیوەندیمان بە تەقینەوەکەی ئیستەنبووڵەوە نییە"
ناوچەکانی ژێر کۆنتڕۆڵی هەسەدە لە یەکشەممەی هەفتەی رابردووەوە کەوتوونەتە بەر تۆپباران و بۆردوومانی بەردەوامی سوپای تورکیا و گرووپە چەکدارە سوورییەکانی هاوپەیمانی. ئەو هێرشانە لە کاتێکدان کە ماوەی چەندین مانگە رەجەب تەیب ئەردۆغان، سەرۆککۆماری تورکیا هەڕەشەی ئەنجامدانی لەشکرکێشیەکی نوێ دژی شەڕڤانان دەکات کە بە "تیرۆریست" دایاندەنێت.
بەرپرسانی تورکیا دەڵێن، هێرشەکان بۆ "تۆڵەسەندنەوەن لە ئەنجامدەرانی" تەقینەوەکەی 13ی نۆڤەمبەری ئیستەنبووڵ، کە تورکیا پەنجەی تۆمەت بۆ یەپەگەی پێکهێنەری سەرەکی هەسەدە، هەروەها پەکەکە درێژدەکات.
فەرماندەی گشتیی هەسەدە دووبارە رەتیکردەوە، هێزەکانیان هیچ پەیوەندییەکی بە رووداوە خوێناوییەکەوە هەبێت، بەڵکو جەختیکردەوە، لە لێکۆڵینەوەکانیاندا دەرکەوتووە کە ئەنجامدەرانی تەقینەوەکە "هەموویان داعشن و دانیشتووی عەفرینن کە لە ژێر کۆنتڕۆڵی تورکیادایە."
مەزڵووم کۆبانێ باسی لەوە کرد کە ناوی ئەو کەسانەی تورکیا دەڵێت، راستەوخۆ لە تەقینەوەکە تێوەگلاون، لای هەسەدە ئاشکران و "هەموویان داعشن،" گوتیشی "وێنەکانیشیان لای ئێمە هەن."
هەروەها راشیگەیاند: "لە ماوەیەکی نزیکدا راپۆرتێک لە بارەی ئەو کەسانەوە بڵاودەکەینەوە."
مەزڵوم عەبدی ئامادەیی خۆشیان خستەڕوو کە "ئەگەر لێکۆڵینەوەیەکی نێودەوڵەتیی بێلایەن بکرێت، ئامادەین تا کۆتایی پشتیوانیی بکەین."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ