لە لوڕستان 'بەهۆی خەواڵوویی شۆفێرێک' رووداوێکی هاتووچۆ کەوتەوە و چوار کەس گیانیان لەدەستدا

 

 

ئەمڕۆ هەینی 27-09-2024، لە نزیک شاری کۆیەشتی پارێزگای لوڕستانی رۆژهەڵاتی کوردستان، بەهۆی پێکدادانی ئۆتۆمبێلێکی جۆری پیژۆ 405 و تەکسییەک، چوار کەس گیانیان لەدەستدا.

 

محەممەد زارعی، بەڕێوەبەری پۆلیسی پارێزگاکە لەوبارەوە رایگەیاند، سێ سەرنشین و شۆفێری تەکسییەکە دەستبەجێ گیانیان لەدەستداوە و تەرمەکانیان گواستراونەتەوە بۆ دادپزیشکیی شارەکە.

 

محەممەد زارعی گوتی، بەهۆی رووداوەکەوە یەکێک لە ئۆتۆمبێلەکان گڕی گرتووە و جیا لەوانەی گیانیان لەدەستداوە، ژمارەیەک لە سەرنشینانیش بریندار بوون کە دوای دەرهێنانەوەیان گەیێندراونەتە نەخۆشخانە.  

 

بە گوتەی بەڕێوەبەری پۆلیسی پارێزگاکە، هۆکاری رووداوەکە لادان بۆ سایدی بەرامبەر و خەواڵوویی شۆفێری یەکێک لە ئۆتۆمبێلەکان بووە.

 

ساڵانە لە ئێران و رۆژهەڵاتی کوردستان ژمارەیەکی زۆری خەڵک بە رووداوی هاتووچۆ گیانیان لەدەستدەدەن. بەگوێرەی راپۆرتی دادپزیشکیی ئێران، لە 21-03-2024ـوە تاوەکو 21-07-2024، شەش هەزار و 262 کەس لە ئێران و رۆژهەڵاتی کوردستان بەهۆی رووداوی هاتووچۆوە گیانیان لەدەستداوە و 127 هەزار و 350 کەسیش بریندار بوون.