رووداو دیجیتاڵ
بودجەى کەرکووک بۆ ئەمساڵ زیاتر لە 80 ملیار دینار کەمیکردووە و بووەتە نیوەى ساڵى رابردوو. پەرلەمانتارێکى پارێزگاکە دەڵێت، "بودجەى پترۆدۆلاری ساڵى رابردوو خەرج نەکراوە".
بەگوێرەى خشتەى بودجەى 2024ى عێراق، خەرجى سەرمایەى پارێزگاى کەرکووک بۆ ئەمساڵ بە 116 ملیار و 168 ملیۆن دینار دیاریکراوە. ئەو خەرجییە لە بودجەى وەبەرهێنان بۆ پڕۆژەکان و خەرجى رەوان پێکدێت و بۆ پارەدارکردنی پرۆژەکانە.
ساڵی رابردوو بودجەی کەرکووک 196 ملیار و 678 ملیۆن دینار بووە، بەو پێیە بودجەی ئەمساڵ بەراورد بە ساڵی رابردوو 80 ملیار و 500 ملیۆن دینار کەمیکردووە.
سەباح حەبیب، ئەندامى پەرلەمانى عێراق لە پشکى کەرکووک بە تۆڕى میدیایی رووداوى راگەیاند، "لەسەر بودجەى کەرکووک و ئەو کەمبوونەوەیە، لەگەڵ لیژنەى دارایی پەرلەمان کۆدەبینەوە".
لە مانگى ئابى 2023وە کە یاساى بودجە کارا بووە، تاوەکو مانگى ئایارى 2024، زیاتر لە سێ ملیۆن و 392 هەزار بەرمیل نەوتى کەرکووک هەناردەى ئوردن کراوە، سەباح حەبیب گوتى، "تاوەکو ئێستا پارەى پترۆ دۆلارى ساڵى 2023 بۆ کەرکووک خەرج نەکراوە".
بەگوێرەى یاسای بودجەى گشتى، دەبێت 5%ى داهاتى نەوت یان گاز لە چوارچێوەى بودجەى پترۆ دۆلار بۆ پارێزگا بەرهەمھێنەرەکانى تەرخان بکرێتەوە.
بودجەى 2024ی عێراق زیاتر لە 211 تریلیۆن دینارە، 55 تریلیۆن دینارى بۆ وەبەرهێنانە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ