رووداو دیجیتاڵ
خاوەنی کۆمپانیاکانی حەج و عومرە لە هەرێمی کوردستان داوا دەکەن بەڕێوەبەرایەتیی حەج و عومرە لە ئیدارە سەربەخۆکان بکرێتەوە. سەرۆکی لیژنەی ئەوقافیش لە پەرلەمانی کوردستان دەڵێت، داواکارییەکەیان ئاراستەی ئەنجوومەنی وەزیران کراوە.
ئەمڕۆ چوارشەممە 23-02-2022 لیژنەی ئەوقاف و کاروباری ئاینی حکومەتی هەرێمی کوردستان بە سەرپەرشتی د.هەورامان گەچێنەیی، سەرۆکی لیژنەکە، جێگری سەرۆک، بڕیاردەر، راوێژکاران و ئەندامانی لیژنەکە لە بارەی چەند پرسێک کۆبوونەوە.
د.هەورامان گەچێنەیی، سەرۆکی لیژنەی ئەوقاف و کاروباری ئاینی بە تۆڕی میدیایی رووداوی راگەیاند، یەکێک لەو بابەتانەی کە گفتوگۆیان لە بارەوە کردووە داواکاریی کۆمپانیاکانی حەج وعەمرە بووە، کە دەیانەوێت بەڕێوەبەرایەتیی حەج و عومرە لە ئیدارە سەربەخۆکان بکرێتەوە.
گەچێنەیی گوتی: "پشتگیریمان لە داواکارییەکانیان کردووە و بە نووسراو ئاراستەی ئەنجوومەنی وەزیرانمان کردووە، چاوەروانی وەڵامی ئەوانین".
هەرێمی کوردستان خاوەنی چوار ئیدارەی سەربەخۆیە، کە سەرەتا راپەرین و گەرمیان وەک ئیدارەی سەربەخۆ راگەیێندران، ساڵی رابردووش زاخۆ و سۆران کرانە ئیدارەی سەربەخۆ.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ