هەڵەیەک روویدا! دووبارە هەوڵبدە
سستبوونی بازاڕی خانووبەرە لە هەرێمی کوردستان
رووداو دیجیتاڵ
"بازاڕی خانووبەرە لە هەرێمی کوردستان سست بووە"، ئەمە گوتەی زۆرینەی کۆمپانیا و نووسینگەکانی کڕین و فرۆشتنی خانوو و زەوییە. بەراورد بە ساڵانی رابردووش ئەمساڵ کڕینی خانوو و شوقە لەلایەن هاووڵاتییانی عەرەبەوە، بەڕێژەی زیاتر لە 50٪ کەمی کردووە.
لە ئامارەکانی یەکێک لە کۆمپانیاکانی خانووبەرە لە هەولێر دەردەکەوێت؛ ئێستا کڕینی شوقە و خانوو لە هەولێر لەلایەن کورد و عەرەبەوە بەڕێژەی 50 بە 50ـیە، لەکاتێکدا ساڵانی رابردوو زیاتر لە سێ بەشی کڕیاران عەرەب بوون، هۆکارەکەشی بۆ ئەوە دەگەڕێننەوە 'ئێستا کڕیارانی عەرەب روویان لە بەغدا و باشووری عێراق کردووە، چونکە لەوێ لەکاتی فرۆشتنەوەدا، قازانج زیاترە."
دیار عەلی، بەڕێوەبەری کۆمپانیای دیار بۆ خانووبەرە دەڵێ "ئەگەر باسی داتای ئەم مانگە بکەین، لەو لقەی ئێمە کە ناوەڕاستی شارە؛ هەم کورد و هەم عەرەب خانوو دەکڕن. بۆ ئەم مانگە 11 گرێبەستمان هەن، شەشیان کورد و پێنجیان عەرەبن، هۆکارەکەی ئەوەیە؛ وەبەرهێنان لە ناوەڕاست و باشووری عێراق باشترە."
کەمبوونەوەی کڕیاری عەرەب، خواستی لەسەر کڕینی شوقە و خانوو کەمکردووەتەوە. هەروەها زۆربوونی پڕۆژەکانی نیشتەجێبوون، کە تاوەکو خستنەڕوو زۆرتر بێت، بەها کەمتر دەبێت، بە هۆکارێکی دیکە دادەندرێت بۆ دابەزینی نرخی یەکەی نیشتەجێبوون لە هەرێمی کوردستان.
سەلام فەقێ، خاوەنی کۆمپانیای حاجی سەلام بۆ خانووبەرە دەڵێ " گەڕانەوەی عەرەبەکان، دۆخی ئاسایشی بەغدا و ئەو ناوچانە کاریگەرییان هەبووە. ژمارەیەکی زۆر شوقەمان دروست کردووە، ئەگەر بۆ ئەوان نەبێت، بێگومان بازاڕیان کەمتر دەبێت."
ئەگەرچی کڕینی شوقە و خانوو لەلایەن عەرەبەوە کەمی کردووە، بەڵام هەر لە ئامارەکانی کۆمپانیاکانی خانووبەرەدا دەردەکەوێت، بەکرێگرتنی یەکەی نیشتەجێبوون لەلایەن هاووڵاتییانی عەرەبەوە کەمینەکردووە و وەک خۆیەتی.
بەگوێرەی بەدواداچوونی کۆمەڵەی کرێنشینانی هەرێمی کوردستان، نزیکەی 680 هەزار یەکەی نیشتەجێبوون لە هەرێمی کوردستان بە ناوی کەسانی عەرەبەوە کراون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ