لاهوور شێخ جەنگی: ئەگەر هەڤاڵانمان ئامادەنەبوون بۆ کاری پێکەوەیی بەجیا بە ناوی یەکێتییەوە کار دەکەین

 

پەیامە ڤیدیۆییەکەی لاهوور شێخ جەنگی کە ماوەکەی هەشت خولەک و 10 چرکە بوو، شەوی چوارشەممە 22-02-2023 بڵاوکرایەوە. ئەو دەڵێت لەمڕۆوە وەکو هاوسەرۆکی یەکێتی دەست بە چالاکییە سیاسییەکانی دەکاتەوە.

 

لاهوور شێخ جەنگی، لە پەیامەکەیدا دەڵێت، لە دوای رووداوەکانی هەشتی تەمموزەوە، هەموو هەوڵێکیان بۆ ئەوە بووە رێگری لەو "پیلانگێڕی"ـیانە بکەن کە بە گوتەی ئەو ناحەزان و نەیارانیان دەیانویست دۆخی ناوخۆی یەکێتی و دۆخی هەرێمی کوردستانیش بەرەو لێکترازانی گەورە ببەن، "ئەوەی بە خەبات و تێکۆشانی چەندین ساڵەی پێشمەرگە قارەمانەکان و هەموو تێکۆشەران و دەیان هەزار خوێنی شەهیدی ئەم گەلە بەدەستهاتووە، لەناوی ببەن". لاهوور شێخ جەنگی دەڵێت: "بەڵام ئێمە لە پەرۆشیمان هەوڵی خاوکردنەوەی گرژییەکان و پاراستنی دۆخەکەمان دا".

 

لاهور شێخ جەنگی بەبێ ئەوەی ناوی کەس بهێنێت دەڵێت، چەند هەڤاڵێکی ئەویان "تیرۆر و شەهید" کردووە.

 

هەروەها دەڵێت: "سەرباری ئەوەی بە نایاسایی و دوور لە هەموو عورفێکی حیزبی مامەڵەمان لەگەڵدا کرا، بەڵام ئێمە تەنیا لە خەمی بەرژەوەندییە باڵاکانی گەل و نیشتمان بووین، دوور لە بەرژەوەندیی شەخسی و حیزبی، لەپێناو زیاتر تێکنەچوونی دۆخەکە هەر دانمان بەخۆماندا گرت".

 

دەشڵێت بۆ چارەسەرکردنی کێشەکان رێگە راستەکەیان هەڵبژارد و روونیدەکاتەوە "بە گرتنەبەری رێگەی مەدەنی و یاسایی و پەیڕەوی و بۆ بەسەروەرکردنی یاسا، هەوڵماندا لە دادگا بەرگری لە خۆمان بکەین لە هەموو ئەو تۆمەتە ناڕەوایانەی ئاڕاستەمان کرابوون. بێتاوانیی خۆمان سەلماند کە هەمووشتان شایەتی ئەوەمان بۆ دەدەن، چونکە پێمانوایە کۆمەڵانی خەڵک و یەکێتییەکان زۆر لەوە گەورەترن، کە تووشی ترس و دڵەڕاوکێیان بکەین و ژیانیان بخەینە مەترسییەوە".

 

لاهوور شێخ جەنگی باسی ئەوەش دەکات، لەمەودوا دەسەڵاتەکانی وەکو هاوسەرۆک بەکاردەهێنێت و دەڵێت: "دوای ساڵ و نیوێک لە پشوودرێژی، سەرەنجام بە بڕیاری دادگا هەموو مافە سیاسییەکانمان بۆ گەڕایەوە، کە بە شەرعیەتی کۆنگرەی چوارەمی یەکێتیی نیشتمانیی کوردستان و بە دەنگی ئەندامان و کادری دڵسۆزی یەکێتی بەدەستمان هێنابوون، بۆیە لەمڕۆوە وەک هاوسەرۆکی یەکێتی نیشتمانیی کوردستان دەستدەکەینەوە بە چالاکییە سیاسییەکانمان و بە پشتیوانیی هەڤاڵان و ئەندام و کادرانمان لەگەڵ هێز و لایەنە سیاسییەکانی کوردستان و عێراق هەوڵی یەکڕیزی و بەدیهێنانی خۆشگوزەرانی بۆ هاووڵاتییان دەدەین".

 

پێش پەیامەکەی ئەمڕۆی، دوایین پەیامی ڤیدیۆیی کە لاهوور شێخ جەنگی بڵاویکردووەتەوە لە 26ـی تشرینی دووەمی ساڵی 2021 بوو. لە درێژەی پەیامەکەی ئەمڕۆییدا دەڵێت: "یەکێتی لە نێو حکومەت و لە پەیوەندییەکانی نێوخۆی و هەرێمیش لاواز بووە".

 

دەشڵێت: "یەکێتیی نیشتمانی کوردستان دەبێت شانازی بەخۆیەوە بکات کە هەمیشە ئەندام و کادرەکانی بوونەتە کۆڵەکەیەک و پاراستوویانە. خۆتان باش ئاگادارن ژیانی رێکخراوەیی و حیزبی لەناو یەکێتی بەرەو چ ئاقارێک ڕۆیشتووە، لە ماوەی ئەم ساڵ و نیوەدا رۆژانە پەرۆشی و گلەیی و گازەندەی ئێوە و کەسوکاری سەربەرزی شەهیدان و دڵسۆزانی یەکێتی و کۆمەڵانی خەڵکی کوردستانم پێگەیشتووە".

 

لاهوور شێخ جەنگی لە درێژەی پەیامەکەیدا دەڵێت: "منیش وەک ئێوە نیگەرانم لە لاوازبوونی دۆخی یەکێتی و خراپبوونی پەیوەندییە ناوخۆیی و هەرێمایەتی و نێودەوڵەتییەکان، کە لە مێژووی یەکێتیدا وەک ئێستا نەبووە. ئەدای لەناو حکومەت لاواز بووە و کاریگەریی ئەوتۆی نەماوە لە بڕیارە گرنگ و چارەنووسسازەکان لە عێراق و کوردستان، کە ئەوەش راستەوخۆ کاریگەری کردووەتە سەر ژیانی کۆمەڵانی خەڵکی کوردستان".

 

لاهوور شێخ جەنگی هەڕەشەی ئەوەش دەکات بەجیا و لەژێر ناوی یەکێتی درێژە بە کارەکانی بدات و دەڵێت: "خۆ ئەگەر هەڤاڵانمان ئامادەنەبوون بۆ کاری پێکەوەیی، ئەوا ناچاردەبین بە جیا و لەژێر ناوی یەکێتیی نیشتمانیی کوردستان و پشتبەست بە یاسا و لە چوارچێوەی پەیڕەوی ناوخۆدا، درێژە بە خەبات و چالاکییە سیاسییەکانمان بدەین، کە من و هەڤاڵەکانم هیوا بەوە ناخوازین، چونکە هەمووتان دەزانن ئەوە خزمەت بە هیچ لایەک ناکات".

 

باسی ناوەڕۆکی ئەو پەیامەش دەکات، کە بۆ ئەنجوومەنی سەرکردایەتیی یەکێتی ناردووە و دەڵێت: "لەو سۆنگەیەشەوە پەیامێکم ئاراستەی ئەندامانی بەڕێزی ئەنجوومەنی سەرکردایەتی کردووە، کە رۆڵی خۆیان ببینن لە ئاست ئەو بەرپرسیارێتییەی لەسەر شانیانە، بۆ ئەوەی بەیەکەوە ئەم دۆخە هەستارە تێپەڕێنین و شکۆ و سەروەری بگەڕێنینەوە بۆ حیزبی شەهیدان. هیوادارین ئەم نسکۆیەی بەسەر حیزبەکەماندا هێنرا، پەندێک بێت بۆ بەخۆداچوونەوە و راستکردنەوەی هەڵەکانی رابردوو".

 

لاهوور شیخ جەنگی، باسی دۆخی خەڵک لە پارێزگاکانی سلێمانی و هەڵەبجە و ئیدارە سەربەخۆکانی گەرمیان و راپەڕین دەکات و دەڵێت دۆخەکە خراپبووە، ئەو لە گوتارەکەیدا دەڵێت" هەوڵەکانی من لە پەیوەست بە داکۆکی لە شەرعیەتی کاری سیاسیی ناو یەکێتیی نیشتیمانیی کوردستان تەنیا پرسێکی حیزبی و کەسی نییە، بەڵکو پەیوەستە بە خەمی گشتیی کۆمەڵانی خەڵکی کوردستان بە گشتی و دەڤەری سەوز بە تایبەتی. یەکێتی حیزبی حوکمڕانی ئەو ناوچەیەیە و لە ماوەی رابردووشدا خەڵک خۆیان شایەتن کە دوای کودەتا بەسەر شەرعیەتی ئەو حیزبە لە هەموو روویەکەوە چ نائارامیی و بێهیواییەک رووی کردووەتە ناوچەکە، ئەگەر ژیانی خەڵک ئارام و خزمەتگوزاریی باش و پرۆژەکان کرابان، بۆ بەندە ئاسانتر بوو لە دوورەوە دەستخۆشی لە هاوڕێکانم بکەم و شانازی بە حیزبەکەمەوە بکەم، جا پۆست و پایەم هەرچییەک بێت، بەڵام هیچ بوارێک نەماوە لە غیابی ئێمەدا خراپتر نەبووبێت".

 

لەبارەی خراپبوونی دۆخەکەشەوە بۆ یەکێتی دەڵێت: "تووڕەیی و گلەیی و ناڕەزایەتی و بێزاریی لە حیزب و حکومەت لەو سنوورە، گەیشتووەتە ئاستێکی مەترسیدار، بە سەربازگەکردن و بڵاوکردنەوەی ترس و تۆقاندن و خراپیی دۆخی بازاڕ و بازرگانەکان و سەرانەسەندن و تێکشکاندنی دامەزراوەکان و دەستگیرکردنی ڕۆژنامەنووسان و نەهێشتنی پانتایی ئازادیی رادەربڕین و راگەیاندن و جێگرتنەوەی حیزب لە جیاتی حکومەت کە هەموو ئەمانە دوورن لەو پرەنسیپانەی یەکێتی خەباتی بۆ کردوون، هێندە بەسە بیڵێم بە درێژایی ساڵانی ڕابردوو کەسانێک نوێنەرایەتی ئەم دەڤەرەیان کردووە تاکە یەک پرۆژەی ستراتیژیان نییە پێشکەشی خەڵکیان کردبێت".

 

لە بەشێکی دیکەی پەیامەکەیدا لاهوور شێخ جەنگی دەڵێت: "لێرەوە ئامۆژگاریی هەڤاڵانمان دەکەم کە بە دەستتێکەڵکردن لەگەڵ ناحەزان هەڵنەخەڵەتێن. باوەشکردن بە نەیاران و دوژمنانی ئەم ئەزموونەی بەدەستهاتووە، لەپێناو مانەوە لە پۆستێکدا خزمەتیان پێناگەیەنێت، بێبەهاپیشاندان و بە سیاسیکردنی بڕیاری دادگا لە هەرێمی کوردستان خزمەتیان ناکات، تەنیا ڕێگەی ڕاست گەڕانەوەیە بۆ شاڕێی سیاسی و حیزبایەتیکردن بە ڕێگەی سیاسی و پەیڕەویی".

 

لە گوتارەکەیدا لاهوور شێخ جەنگی باسی هەڵبژاردن دەکات و دەڵێت: "دەبێت هەڤاڵانمان بزانن پێکەوە دەتوانین دەنگدەران و کەسوکاری شەهیدان و کادر و ئەندامەکانمان ئاشتبکەینەوە و خۆمان بۆ ئەو هەڵبژاردنە پەرلەمانییانە ساز و ئامادەبکەین کە لە ئاییندەی نزیکدا دێنە پێش، چونکە جەماوەر لەوە زیاتر لێمان قبووڵ ناکات، خۆ ئەگەر عینادیی سیاسی هەڵبژێرن دەبێت باش بزانن کە سندووقەکانی دەنگدان دەریدەخەن کێ گەل پەسەند و کێش خەڵکی بێ هیوا کردووە، هەڵبژاردن یەکلاکەرەوە دەبێت کێ خاوەنی سەنگی راستەقینەیە لەناو حزب و جەماوەردا."

 

هاوکات بەشێک لە پەیامەکەی بۆ لایەنە سیاسییەکانی هەرێمی کوردستان تەرخاندەکات و لە پەیامە ڤیدیۆییەکەیدا باسی دۆخی هەرێمی کوردستان دەکات و لەوبارەیەوە دەڵێت: "هەموو لایەکتان باش دەزانن کە پەیوەندییەکانی هەرێم لە چ ئاستێکدایە و وڵاتانی دەرەوە چۆن نیگەرانن لە پاشەکشەی سیاسی و حکومڕانی لەم هەرێمە، دۆخەکە بەرەو بنبەستی تەواو دەڕوات، ئەوەش قەوارەکەی خستووەتە بەردەم مەترسیی جدی و ترسناکەوە، بێدەربەستی و خۆپەرستی هەندێ فیگەری سیاسی خەریکە کۆی دۆخەکە بەرەو ئاڕاستەی نەخوازراو دەبات.".

 

لاهوور شێخ جەنگی هەر لەو بەشەی پەیامەکەیدا کە رووی لە حیزبەکانە، دەڵێت: "پێویستمان بە هاوخەباتی و کاری پێکەوەیی و یەکڕیزیی نیشتمانی هەیە، مەترسی ناوخۆیی و دەرەکییەکان، ئاستی ژیانی کۆمەڵانی خەڵک، بەرزبوونەوەی ناڕەزایەتییەکان و بێئومێدیی گەنجەکانمان، فراوانبوونی ناکۆکی و دووبەرەکی نێوان یەکێتی و پارتی و ئیفلیجبوونی حوکمڕانی، فشارەکان لە بەغدا، دەیان کێشەی تر ئەوەمان لێ ئەخوازێت قووڵتر و خەمخۆرانەتر بیر لە دۆخەکە و چارەسەری سیاسییانەی دوور لە هەڵچوون و خۆپەرستی بکەینەوە."

 

سەبارەت بە پەیوەندییەکان لەگەڵ بەغدا و قەوارەی هەرێمی کوردستانیش، لاهوور شێخ جەنگی دەڵێت: "لە رابردووشدا چەندین جار رامانگەیاندووە و ئێستاش دووپاتی دەکەمەوە پێویستمان بە یەکگرتوویی و کرانەوەی زیاترە لەگەڵ بەغدا لە رێگەی دیالۆگی نیشتمانی لەگەڵ هێز و لایەنە عێراقییەکان لە پێناو چارەسەرکردنی یەکجاری کێشە هەڵپەسێردراوەکانی نێوان حکومەتی هەرێم و حکومەتی فیدراڵی عێراق، داواکارم ناکۆکییە سیاسییەکان بەلاوە بنێین و دەستلەناودەست قۆڵی لێهەڵماڵین و هەنگاوی ڕاستەقینە و جدی بۆ بنێین تا پێگە و قەوارەی سیاسیی هەرێمەکەمان بەهێز و پارێزراوتر بکەین و میللەتەکەشمان لەم دۆخە ناهەموارە رزگار بکەین."