رووداو دیجیتاڵ
پاش راگرتنی هونەرمەند شیروان عەبدوڵڵا لەلایەن ئاسایشی فڕۆکەخانەی هەولێرەوە لەسەر داوای ئاسایشی سلێمانی، ئەمڕۆ ئازادکراو بە گوتەی خۆی بۆ شاری سلێمانی بەڕێکەوتووە.
شیروان عەبدوڵڵا، هونەرمەندی میلـلی بە رووداوی راگەیاند "ئێستا لە هەولێرەوە دەگەڕێمەوە شاری سلێمانی "، سەبارەت بە راگرتنیشی بۆ ماوەی نزیکەی 24 کاژێر لە فڕۆکەخانەی نێودەوڵەتیی هەولێر گوتی "لێکتێنەگەیشتنێک هەبووە و سوپاس بۆ خودا ئازادکراوم".
ئەو هونەرمەندە میلـلییە ئاماژەی بەوەش کرد کە کارێکی هونەریی تایبەت بە سلێمانیی هەیە، کە کلیپێکە و ئاواز و تێکستی گۆرانییەکە هی هەڤاڵ ئیبراهیمە.
شیروان عەبدوڵڵا ماوەی چوار ساڵە لە وڵاتی ئەڵمانیا نیشتەجێ بووە، رۆژی دووشەممە 20ی تەممووزی 2020 لەڕێگەی فڕۆکەخانەی نێودەوڵەتیی هەولێرەوە گەیشتەوە هەرێمی کوردستان.
سەرۆکی گشتیی کۆمەڵەی هونەری میلـلیی کوردستان پێشتر بە تۆڕی میدیایی رووداوی راگەیاند، شیروان عەبدوڵڵا، هونەرمەندی میلـلی لەکاتی گەڕانەوەی بۆ هەرێمی کوردستان لە هەولێر لەلایەن ئاسایشی فڕۆکەخانەی هەولێرەوە دەستگیرکراوە. بەڕێوەبەری ئاسایشی هەولێریش رایگەیاند، لەسەر داوای ئاسایشی سلێمانی "راگیراوە".
د. تارق نووری، بەڕێوەبەری گشتیی ئاسایشی هەولێر ئاماژەی بەوە کرد، ئەو هونەرمەندە لەلایەن ئاسایشی فڕۆکەخانەوە "راگیراوە" لەسەر بنچینەی نووسراوێکی ئاسایشی سلێمانی کە پێشتر بۆ تەواوی فڕۆکەخانە و دەروازە سنووورییەکانیان ناردبوو.
بە گوتەی جەزای ساز، سەرۆکی گشتیی کۆمەڵەی هونەری میلـلیی کوردستان، شیروان عەبدوڵڵا بە تۆمەتی ئەوە دەستگیرکراوە کە "پێش گەشتکردنی بۆ ئەوروپا کارمەندی ئاسایشی سلێمانی بووە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ