رووداو دیجیتاڵ
وەزارەتی خوێندنی باڵا دەڵێت، 11 مامۆستای زانکۆی سلێمانی چوونە نێو ریزبەندیی 2%ی توێژەرانی جیهان؛ ئەو پێوەرانەش دیاری دەکات کە مامۆستایانی پێخراونەتە نێو لیستەکە.
وەزارەتی خوێندنی باڵا و توێژینەوەی زانستیی هەرێمی کوردستان لە راگەیێندراوێکدا دەڵێت، "بەگوێرەی نوێترین راپۆرتی زانکۆی ستانفۆرد کە لە نێوەڕاستی مانگی ئەیلوولی 2024 بڵاوکراوەتەوە، 11 مامۆستای زانکۆی سلێمانی لە ریزبەندیی 2%ی توێژەرانی جیهاندان لە بوارە زانستییەکانی خۆیاندا."
وەزارەتەکە دەڵێت، "زانکۆی ستانفۆرد هەموو ساڵێک بە هاوبەشی لەگەڵ دامەزراوەی ئێڵسڤییەر (Elsevier) و بە پشتبەستن بە داتابەیسی سکەوپس (Scopus)، کاریگەرترین 100 هەزار توێژەری جیهان دەستنیشان دەکات و بەسەر 22 بواری سەرەکی و 174 بواری لاوەکیی زانستیدا پۆلێنیان دەکات. دەستنیشانکردنی توێژەرەکانیش پشتبەستە بە (Composite Score)ی توێژینەوەکانیان، کە ئەویش لەسەر بنەمای ئەم پێوەرانەیە:
- کۆی ژمارەی ئاماژەپێدان بە توێژینەوەکان
- ژمارەی H-index
- ژمارەی Hm-index
- ژمارەی ئاماژەپێدانەکان بەو توێژینەوانەی توێژەرەکە بەتەنیا نووسیویەتی
- ژمارەی ئاماژەپێدانەکان بەو توێژینەوانەی توێژەرەکە وەک نووسەری یەکەم ناوی هاتووە
- ژمارەی ئاماژەپێدانەکان بەو توێژینەوانەی توێژەرەکە وەک دوایین نووسەر ناوی هاتووە.
پ. ی. د. زانا مەحموود، یاریدەدەری سەرۆکی زانکۆی سلێمانی بۆ کاروباری زانستی و خوێندنی باڵا بە رووداوی راگەیاند، "ئەو مامۆستایانە لە بوارەکانی پزیشکی، ئەندازیاری و زانستدا پسپۆڕییان هەیە و توێژینەوەکانیان لەو سێ بوارەدایە، دیارە لە توێژینەوە گرنگ و پڕ بایەخەکان هەژمار کراون."
خوێندنی باڵا ئاماژە بۆ ئەوەش دەکات، ئەو ریزبەندییەی زانکۆکە دوای هەڵسەنگاندن بۆ توێژینەوەی توێژەران لە یەک ساڵ و درێژایی ژیانی ئەکادیمییان دەبێت؛ ئاماژە بەوەش دەکات، ژمارەی ئەو مامۆستایانەی زانکۆی سلێمانی کە پشت بە زانیارییەکانی یەک ساڵیان بەستراوە و چوونەتە ریزبەندییەکەی ئەم ساڵەوە بریتییە لە 11 مامۆستا، ئەوانەشی بە پشتبەستن بە درێژایی ژیانی ئەکادیمیشیان دەچنە ناو ریزبەندییەکەوە بریتییە لە سێ مامۆستا.
زانکۆی ستانفۆرد یەکێکە لە زانکۆ بەناوبانگەکانی ئەمەریکا و لە ساڵی 1885دا دامەزراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ