وەزارەتی خوێندنی باڵا: لەم هەفتەیەدا زانکۆلاین رادەگەیێنین

 

 

عەباس ئەکرەم، گوتەبێژی وەزارەتی خوێندنی باڵا و توێژینەوەی زانستیی هەرێمی کوردستان بە رادیۆی رووداوی راگەیاند: "هەفتەی رابردوو مەرج و رێنماییەکانی وەرگرتنی خوێندکار لە زانکۆ و پەیمانگەکانی هەرێمی کوردستانمان بڵاوکردەوە. لەم هەفتەیەیشدا زانکۆلاین بۆ خوێندکاران رادەگەیێنین."

 

وەزارەتی خوێندنی باڵا لەگەڵ راگەیاندنی ئەنجامەکانی قۆناخی 12ی ئامادەییدا ئامادەکارییەکانی بۆ وەرگرتنی دەرچووانی ئەو قۆناخە لە زانکۆ و پەیمانگەکاندا دەستپێکرد. 

 

هەفتەی رابردوو وەزارەتی خوێندنی باڵا ناوی بەکارهێنەر و وشەی تێپەڕی بۆ هەموو دەرچووانی 12ی ئامادەیی دروستکرد. گوتەبێژی وەزارەتی خوێندنی باڵا گوتی: "دەرچووان لە رێگەی قوتابخانەکانیانەوە ناوی بەکاربەر و وشەی تێپەڕیان وەرگرتووە، لەو رێگەیەوە دەتوانن لە سیستمی زانکۆلایندا دوای کاراکرانی فۆڕمی وەرگیران لە زانکۆ و پەیمانگەکان پڕبکەنەوە."

 

عەباس ئەکرەم باسی لەوە کرد، هیچ نمرەیەک بۆ پێشکێشکردنی داواکاری دیارینەکراوە و دەرچووانی ئەمساڵ هەموویان مافی پێشکێشکردنیان هەیە و دەرچووانی ساڵی رابردووش ئەوانەیان داواکرییان پێشکێش نەکردووە یان وەرنەگیراون دەتوانن داواکاری پێشکێش بکەن.

 

گوتەبێژەکەی وەزارەتی خوێندنی باڵا باسی لەوە کرد، ئێستا بۆ وەرگرتنی خوێندکاران لە زانکۆ و پەیمانگەکاندا ناتوانن ئاماژە بە هیچ ژمارەیەک بکەن کە چەندیان وەردەگیرێن، ئەوە پەیوەستە بە ژمارەی داواکارییەکانەوە.

 

عەباس ئەکرەم داوای لە خوێندکاران کرد بە پارە فۆڕمی زانکۆلاین پڕنەکەنەوە و ئەوەی خستەڕوو کە "فۆڕمەکە زۆر ئاسانە و هەموو کەسێک خۆی دەتوانێت پڕیبکاتەوە." هەروەها لە سیستمەکەدا ڤیدیۆی فێرکاریی پڕکردنەوەی فۆڕمەکە هەیە.

 

گوتیشی: "هەر کاتێک کاتی پڕکردنەوەی فۆرمی زانکۆلاین کرایەوە، ئەوا بۆ راگەیاندنی ئەنجامی وەرگیرانی خوێندکاران لە زانکۆ و پەیمانگەکان پێویستمان بە 10-12 رۆژ دەبێت، بەڵام بە دڵنیاییەوە ئەمساڵ زووتر لە ساڵی رابردوو ئەنجامەکان رادەگەیێنین."

 

لەبارەی خوێندنی پارالێڵیشەوە دەڵێت: "لەم کابینەیەی حکومەتدا هەوڵمان داوە کرێی خوێندنی پارالێڵ کەمبکەینەوە و ساڵی رابردووش کەمکرایەوە و ئەمساڵیش کرێی خوێندنی پارالێڵ وەک ساڵی رابردوو دەبێت کە 45٪ـە."