رووداو دیجیتاڵ
پارێزگای بەدلیسی باکووری کوردستان بۆ دوو رۆژ گردبوونەوە، خۆپێشاندان و کۆنفرانسی رۆژنامەڤانیی لە پارێزگاکە قەدەخە کرد.
شەوی هەینی 15-11-2024 پارێزگای بەدلیسی باکووری کوردستان لە هەژماری فەرمیی خۆی لە تۆڕی کۆمەڵایەتیی ئێکس بڵاویکردەوە، لە کاژێر 00:01ی رۆژی شەممە 16-11-2024 تاوەکو کاژێر 23:59ی رۆژی یەکشەممە 17-11-2024، بەدەر لەو چالاکییانەی لەلایەن پارێزگا و قایمقامیەتەوە مۆڵەتیان پێدەدرێت، هەموو جۆرە چالاکییەکی دیکە قەدەخەیە.
لە راگەیێندراوەکەی پارێزگادا هاتووە، بەپێی مادەکانی یاسای ژمارە 2911ی رێپێوان و کۆبوونەوە و مادەکانی یاسای ژمارە 5442ی کارگێریی پارێزگا، بە مەبەستی پاراستنی ماف و ئازادییەکان و رێگریکردن لە هاندان بۆ کاری خراپە، چالاکییەکانی وەک کۆنفرانسی رۆژنامەڤانی، گردبوونەوە، رێپێوان، خێوەت هەڵدان و راپرسی قەدەخەن.
راگەیێندراوەکە لە کاتێکدایە، رۆژی 04-11-2024، بە بڕیاری وەزارەتی ناوخۆی تورکیا، قەیووم بۆ گەورە شارەوانیی مێردین، شارەوانی ئێلیهـ و شارەوانی شارۆچکەی خەلفەتی سەربە پارێزگای رووهای باکووری کوردستان دانرا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ