prev
next
رووداو دیجیتاڵ
یەکێک لە رێگە سەرەکییەکانی نێوان سلێمانی و هەولێر، کە دەربەندی گۆمەسپانە و بە دۆڵی سماقووڵیدا دەڕوات، بەهۆی باران و سەرنەکەوتنی بارهەڵگرەکانەوە داخرا. قایمقامی سنوورەکە دەڵێت، کێشەی رێگەکە چارەسەر دەکەن.
رێگەی دەربەندی گۆمەسپان کە لە رووی کارگێڕییەوە سەر بە قەزای پیرمامە لە پارێزگای هەولێر، نوێیە و دوای دروستکردنی بەنداوی گۆمەسپان، وەکو رێگەی جێگرەوە دروستکرا. قایمقامی قەزاکە دەڵێت، بۆ چارەسەرکردنی هەر کێشەیەک، کۆمپانیای جێبەجێکاریان ئاگادار کردووەتەوە.
حەمید کاکەیی، قایمقامی قەزای پیرمام، ئەمڕۆ (یەکشەممە، 22-12-2024) بە تۆڕی میدیایی رووداوی گوت "رێگەکە بەرزاییەکی تێدایە و بەهۆی بارانەوە بارهەڵگرەکان نەیانتوانیوە سەرکەون و ئاستەنگییان بۆ هاتووچۆ دروستکردووە، بۆیە داخراوە."
رێگەکە قیرتاوە و پێش بارانبارینی هەیینی رابردوو گرفتی نەبووە. قایمقام دەڵێت، لەگەڵ کۆمپانیای جێبەجێکار قسەیکردووە؛ "ئەمڕۆ و سبەی دەستبەکار دەبن و هەرکێشەیەک لە رێگەکە دا هەبێت، چارەسەری دەکەن."
رێگەی دەربەندی گۆمەسپان لە سنووری قەزاکانی کۆیە و دووکانەوە پارێزگای سلێمانی بە هەولێر دەبەستێتەوە. هاوکات رێگەیەکیشە بۆ هاتووچۆی ناوچەکانی پیرمام، شەقڵاوە و ناوچەی خۆشناوەتی بۆ شاری هەولێر.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ