لە لوڕستان پێنج ئەندامی خێزانێک لە ماڵەکەی خۆیاندا گیانیان لەدەستدا

 

ئەسغەر قەهرەمانی، قایمقامی شاری دۆلفان، رایگەیاند، سەرجەم ئەندامانی خێزانێک، کە پێنج کەسن، گیانیان لەدەستداوە. کاژێر 04:00ـی دوانیوەڕۆی رۆژی دووشەممە (13-11-2023) بەهۆی سەردانی خزمەکانیانیانەوە بە رووداوەکە زانراوە.

 

بەگوتەی ئەسغەر قەهرەمانی، ئەو خێزانە ژن و پیاوێک و سێ منداڵی تەمەن 10، 8 و 6 ساڵان بوون.

 

قایمقامی شاری دۆلفان گوتیشی بەپێی لێکۆڵینەوە سەرەتاییەکان، دەرکەوتووە ئەو خێزانە بەهۆی هەڵمژینی گازی مۆنۆکسیدی کاربۆن، کە لە گیزەری حەمامەکەیانەوە بەنێو ماڵدا بڵاوبووەتەوە، گیانیان لەدەستداوە و بەوردیش نازانرێ چ کاتێک گیان لەدەستداوە.

 

لە ئێران و رۆژهەڵاتی کوردستان ساڵانە دەیان کەس بەهۆی لێچوونی گازەوە گیان لەدەستدەدەن و بەشێکی ئەمەش بۆ کەمتەرخەمیی خێزانەکان دەگەڕێتەوە.

 

بەپێی راپۆرتی دادپزیشکی ئێران، لە شەش مانگی بەهار و هاوینی ئەمساڵدا 274 کەس بەهۆی لێچوونی گازەوە گیانیان لەدەستداوە؛ بەڵام ئەم ژمارەیە لە وەرزە ساردەکانی ساڵدا، کە خەڵک سۆپای گاز بۆ خۆگەرمکردنەوە بەکاردەهێنن، زیاتریش دەبێت.