ژمارەیەک هاونیشتمانی لە گوندی کەپران لە سنووری گوێڕ رووبەڕووی چەند چەکدارێک بوونەوە
رووداو دیجیتاڵ
دەنگۆ لەنێو دانیشتووانی گوندی کەپران لە سنووری گوێڕ بڵاوبووەوە کە گوایە لە ناوچەکەیاندا چەکداری داعش بینراون، بەڵام فەرماندەیەکی پێشمەرگە لە میحوەرەکە دەڵێت، دوو جار کێوماڵی ناوچەکەیان کردووە و هاونیشتمانیان دڵنیا دەکاتەوە کە ناوچەکە ئارامە و هیچ شەڕ و رووبەڕووبوونەوەیەک رووینەداوە.
رۆژی هەینی، 12-05-2023، مقەدەم هیمداد زیارەتی لە هێزی کۆماندۆ لە بوولتەنی کاژێر 17:00 بە بەهرۆز فەرەیدوون، پەیامنێری تۆڕی میدیایی رووداوی راگەیاند، "ناوچەی گوێڕ هێزی پێشمەرگەی تێدا جێگیرە و هیچ چەکدارێکی داعش لەم ناوە نەبینراوە و دڵنیایی دەدەین بە دانیشتووانی خەڵکی گوێڕ کە ناوچەکانی ژێر دەسەڵاتی پێشمەرگە ئارامە".
هاونیشتمانییەکی گوندی کەپران بە پەیامنێری رووداوی گوت، دوو شەوە خەڵک بەهۆی ئەو دەنگۆیەوە نەخەوتوون و باس لەوە دەکرێت کە "دوو ماڵ گوندەکەیان جێهێشتووە، بەڵام هیچ کێشەیەک نییە و تێناگەم ئەو خەڵکە بۆ پەشۆکاون".
لەبارەی ئەو دەنگۆیانەش کە دەنگی تەقە لە نزیک گوندی کەپران بیستراوە، مقەدەم هیمداد زیارەتی گوتی، ئەگەر شەڕ و پێکدادانێک بووبێت لەدیوی سوپای عێراقەوە بووە و دەشڵێت، "ناوچەی پشت کەپران سنووری مادەی 140ـە و ئەو کەسانەش کە دەنگۆی بوونی مەترسی لەم ناوچەیە بڵاودەکەنەوە، دژی بوونی هێزی پێشمەرگەن لەم ناوچەیە؛ بۆیە دڵنیایی دەدەینە خەڵکی گوێڕ تاوەکو پێشمەرگە لەم سنوورە بێت، ئەوان پارێزراون و ئێستاش هیچ مەترسییەک لەم ناوچەیە نییە".
ئەو فەرماندەیەی هێزی پێشمەرگە دەڵێت، دوای ئەو دەنگۆیانە، ئەوان دوو جار کێوماڵی ناوچەکەیان کردووە و وەکو ئاماژەی پێدەدات، "لە شەوی رابردووەوە هێزەکانی پێشمەرگە و ئاسایش دەستیان کردووە بە کێوماڵی هەموو ناوچەکە و بەیانی ئەمڕۆش جارێکی دیکە لە کاژێر 07:30ـەوە کێوماڵی ناوچەکەمان کردووە و دڵنیابووینەوە کە ناوچەکە ئارامە و هیچ چەکدارێکی لێ نییە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ