رووداو دیجیتاڵ
بەهۆی تەقینەوەی یاری ئاگرینی دەستکرد لەنێو ماڵێک لە سەڵماس، کەسێک گیانی لەدەستدا و 5ـی دیکەش برینداربوون.
دوانیوەڕۆی ئەمڕۆ چوارشەممە، تەقینەوەیەک لەنێو خانوویەکی سێ نهۆمی لە شارۆچکەی کۆنەشار لە 5 کیلۆمەتری رۆژئاوای شاری سەڵماس لە باکووری پارێزگای ورمێ روویدا.
عەمار فەرید، بەرپرسی بەشی فریاکەوتن لە نەخۆشخانەی سەڵماس رایگەیاند، لە رووداوەکەدا کەسێک گیانی لەدەستداوە و 5ـی دیکەش بریندار بوونە. بە گوتەی بەرپرسی فریاکەوتنی نەخۆشخانەی سەڵماس، سێ لە بریندارەکان بەهۆی سەختی برینەکەیان رەوانەی ورمێ کراون و دوویان تەندروستییان ناجێگیرە.
بەپێی زانیارییەکانی تۆڕی میدیایی رووداو، قوربانییەکان کوردن و خەڵکی گوندی دێلەزی ناوچەی شپیرانی سەڵماسن. ئەوەی گیانی لەدەستداوە ژنە.
زۆربەی دانیشتووانی شارۆچکەی کۆنەشاری سەڵماس کوردن و ژمارەیەکی کەم ئازەریشی لێدەژین.
ساڵانە لە بەرەبەری ساڵی نوێی هەتاوی و رێوڕەسمەکانی چوارشەممەسووری، هەندێک کەس یاری ئاگرینی دەستکرد دروست دەکەن و زۆرجار دەبێتە هۆی روودانی تەقینەوە و هاونیشتمانییان دەبنە قوربانی.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ