کۆنفرانسی رۆژنامەڤانیی پارێزگاری هەولێر لەبارەی فێستیڤاڵی ئازادی و نەورۆز لە شارەکە
رووداو دیجیتاڵ
پارێزگاری هەولێر دەڵێت، فێستیڤاڵی ئەمساڵی ئازادی و نەورۆز لە فێستیڤاڵی ساڵانی رابردوو جیاواز دەبێت و ئاماژە بەوەش دەکات، هەموو ئامادەکارییەک بۆ پاراستنی ئارامی و بەڕێوەچوونی فێستیڤاڵەکە لە ئاستێکی بەرزدا و پێشوازی لە گەشتیاران کراوە.
رۆژی هەینی، 10-03-2023، ئومێد خۆشناو، پارێزگاری هەولێر لە کۆنفرانسێکی رۆژنامەڤانیدا رایگەیاند، 13یەمین فیستیڤاڵی ئازادی و نەورۆز بە سەرپەرشتیی پارێزگا و هاوبەشی و هاوئاهەنگیی بەڕێوەبەرایەتیی گشتیی هونەر و رۆشنبیریی هەولێر و سەندیکای هونەرمەندانی لقی ئەو شارە بەڕێوەدەچێت.
ساڵانە فیستیڤاڵی ئازادی و نەورۆز لە بەیانیی رۆژی 11ـی ئادارەوە کە ساڵڕۆژی راپەڕینی خەڵکی هەولێرە، بە چەندین بڕگەی جیاواز دەستپێدەکات و تاوەکو 20ـی ئادار و هەڵکردنی مەشخەڵی نەورۆز بەردەوام دەبێت.
ئومێد خۆشناو لەبارەی بڕگەکانی فیستیڤاڵەکە گوتی، ''فیستیڤاڵەکەی ئەمساڵ بڕگەکانی جیاوازتر دەبن لە رابردوو و هەموو بوارەکانی ژیان، کولتوور و هونەر بە هەموو لقەکانییەوە لەخۆدەگرێت.''
پارێزگاری هەولێر گوتیشی، بە وەرگرتنی ئەزموون لە ساڵانی رابردوو بۆ دەوڵەمەنترکردن و باشترکردنی فیستیڤاڵەکە، لە بوارەکانی کولتوور، هونەر، ئەدەب، مێژوو، وەرزش، ژینگە و بواری دیکە چالاکی ئەنجام دەدرێن.
بۆ رێزگرتن لەو کەسانەی لە شاری هەولێر لە بوارێکدا خزمەتیان کردووە، رێزگرتنیان بۆ ئەنجام دەدرێت و خەڵات دەکرێن. بڕیارە لە فیستیڤاڵی ئازادی و نەورۆزی ئەمساڵدا کۆلێژی هونەرە جوانەکان و پەیمانگەی هونەرە جوانەکانی هەولێریش وەکو ناوەندی ئەکادیمیی هونەری بەشدار بن.
بەگوتەی ئومێد خۆشناو، لە فیستیڤاڵەکەدا رەچاوی پێکهاتەکانی شاری هەولێریش کراوە و ''ئایینە جیاوازەکان، نەتەوە جیاوازەکانی هەولێریش لە نێو کارەکانی فیستیڤاڵەکە بەشدار دەبن.''
ئەمێد خۆشناو ئاماژەی بەوەش کرد، هەموو ئامادەکارییەک کراوە بۆ ئەوەی فیستیڤاڵەکە لەڕووی ئارامی و بەڕێوەچوونییەوە لە ئاستێکی بەرزدا بێت و بە جوانترین شێوە پێشوازی لە گەشتیاران بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ