هەڵەیەک روویدا! دووبارە هەوڵبدە
زێڕینگرانی هەولێر دەڵێن زۆربەی هاونیشتمانییان بۆ فرۆشتنی زێڕ سەردانیان دەکەن.
رووداو دیجیتاڵ
بێ بازاڕی باڵی بەسەر زێڕینگرانی نێو قەیسەریی هەولێر دا کێشاوە، تاک تاک کڕیارێک لە دووکانەکاندا دەبینرێت، ئەویش یان هاتووە زێڕی دەستپێکی ژیانی هاوژینی بکڕێت، یان کەمێک پارەی لێ زیادبووە و بە هیوای قازانجکردن لیرە دەکڕێت.
پەیامنێری رووداو، دەچێتە دووکانێک کە کڕیارێکی لێیە و سەرقاڵی کڕینی زێڕە. بەهۆی گرانیی نرخی زێڕ، زۆر بە زەحمەت دەتوانێت بڕیار لە کڕینی گوارەیەکی کێش سووک بدات.
عەلی موهەنەد، زێڕنگرە و لەبارەی کڕین و فرۆشتنی زێر دەڵێت، "لەم خولەکە دا فرۆشتن زیاترە، خەڵک دەیفرۆشنەوە نەوەک بیکڕن، تەنیا ئەوە نەبێت کە پارەی هەبێت و بیەوێت بیکاتە زێڕ، یان ئەوەی هاوسەرگیری بکات. بابەتی ژیانی هاوبەشیش دوو حاڵەتە، یان ئەوەیە کامڵە و پایەدارە، ئێستاش هەر 100، 150 و 200 مسقاڵ دەکات، خەڵکی ئاساییش بەگشتی 15 بۆ 10 مسقاڵ زێڕ دەکەن."
تاوەکو دوایین ساتی داخستنی بازاڕەکانی جیهان، لە رۆژی هەینی دا یەک ئۆنسە زێڕ، بە نزیکەی دوو هەزار و 860 دۆلار مامەڵەی پێوەدەکرا. واتە 685 هەزار دینار بۆ زێڕی عەیار 24، 628 هەزار دینار بۆ زێڕی عەیار 22، 600 هەزار دیناریش بۆ عەیار 21 هەروەها 515 هەزار بۆ عەیار 18.
دانا وەرتی، ئەندامی لقی هەولێری سەندیکای زێڕنگرانی هەرێمی کوردستان لەبارەی بەرزی و نزمیی نرخی زێڕ باس لەوە دەکات، "دابەزینێک و گەڕانەوەیەکی کەممان هەیە لە دوو هەزار و 870 دۆلار بۆ دوو هەزار و 852 دۆلار، پاشان بۆ دوو هەزار و 842 دۆلار، لە دوو هەزار و 842 دۆلارەوە بەڕاستی دەبێت سەیری خشتەکە بکەین، ئایا ئەوە کاتییە، یان زیاتر بەرزدەبێتەوە، پێموایە زیاتر لە رووی تەکنیکییەوە ئاراستەکە بەرەو سەرەوەیە."
وریا قاسم بۆ کڕینی زێر سەردانی بازاڕەکەی کردووە و پێیوایە، وەبەرهێنان لە زێڕ ئەگەر بە پارەیەکی کەمیش بێت، باشترە لە هیچ.
وریا قاسم، هاونیشتمانی باس لەوە دەکات، "لەو کاتەوەی ژیانی هاوسەرگیریم پێکهێنا، ئەو بڕوایەم بۆ دروستبوو کە زێڕ شتێکی زۆر باشە، ئەگەر بتوانی بیکڕی و لە ماڵەوە دایبنێی و هەڵیبگری، لەبەرئەوەی هەردەم نرخی لە هەڵکشانە، هیچ کاتێک بەرەو دواوە ناچێت، هەمیشە قازانج لە زێڕ کڕین دەکەی و زیانی لێناکەی."
بانکە نێودەوڵەتییەکانی جیهان پێشبینی دەکەن؛ نرخی زێڕ لە 2025 هەر بە بەرزی بمێنێتەوە، تەنانەت پێشبینی هەیە نرخی یەک ئۆنسەی بگاتە سێ هەزار دۆلار ئەمەش بەهۆی ناسەقامگیریی سیاسی و ئابووری.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ