دارستانی گەرمیان: لەسەر سووتان و بڕینەوەی دارەکانی رووباری سیروان 10 کەس دەستگیرکراون

 

رۆژی شەممە، 4ـی ئاداری 2023، موقەدەم ئەکرەم کامل، گوتەبێژی پۆلیسی دارستان و ژینگەی گەرمیان بە تۆڕی میدیایی رووداوی گوت: "هێزەکانمان بەشێوەی 24 کاژێری کاری خۆیان رادەپەڕێنن. بەداخەوە بەشێکی کەمی خەڵک لەسەرپێچیکردنە ژینگەییەکان بەردەوامن، بەتایبەت راوکردن و داربڕین".

 

لەبارەی دارەکانی قەراخ رووباری سیروانەوە موقەدەم ئەکرەم گوتی: "تەنیا لە دوو مانگی ئەمساڵدا 10 بۆ 12 کەسمان بەهۆی داربڕین و سووتانی ئەو دارانەوە دەستگیرکردووە. بۆمان روونبووتەوە ئەم سەرپێچییە هیچ پەیوەندی بەوەوە نییە کە گوایە نەوت نییە و بۆ خۆگەرمکردنەوە بەکار دەهێندرێن".

 

ئەکرەم کامل گوتیشی: "زۆرینەی ئەوانەی دار دەسووتێنن یان دەیبڕینەوە زەوییان لە نزیک دارەکان هەیە. ئەوان دەچن دارەکان لەنێودەبەن بۆ ئەوەی رووبەری زەوییەکەیان کەمێک زیاتر بێت؛ هەندێکیش بۆ بەخەڵووزکردن و فرۆشتنی، دارەکان دەبڕن".

 

بەگوێرەی ماددەی 21 لە یاسای ژمارە 10ـی ساڵی 2012ـی تایبەت بە دارستان و پاوان لە هەرێمی کوردستان، سزای بڕینەوەی دار لەنێوان سێ ملیۆن دینار بۆ پێنج ملیۆن دینارە و هەندێکجاریش زیندانیکردنە کە ماوەکەی لە ساڵێک تێپەڕ نەکات، بەڵام زۆرینەی بەڕێوەبەرایەتییەکانی پۆلیس و دارستان دەڵێن، دادوەران کار بەو یاسایە ناکەن و تۆمەتباران "بە ئاسانی ئازاد دەکەن".

 

گوتەبێژی پۆلیسی دارستان و ژینگەی گەرمیان گوتی، ئەوانەی لە سنوورەکەیان دەستگیر دەکرێن، دەست بەسەر ئامێرەکانی بەردەستیان و ئۆتۆمبێلەکەشیان دەگیرێت، بەڵام دوای پڕکردنەوەی بەڵێننامەیەک بۆ دووبارە نەبوونەوە ئازاد دەکرێن و ئۆتۆمبێلەکانیشیان دەدرێتەوە. گوتیشی: "ئێمە دەستگیرکردنمان لەسەرە و رادەستی یاسایان دەکەین، بەڵام راوچی هەیە شەش جار دەستگیرمان کردووە و ئازاد کراوەتەوە".

 

بەگوێرەی ئامارەکانی پۆلیسی دارستان و ژینگەی هەرێمی کوردستان بۆ رووداو، ئەمساڵ 5 بارهەڵگری دوو تۆنی و 34 چوار پیکاب داری تەڕ، دوو بارهەڵگری گەورە و 994 فەردە خەڵوز دەستیان بەسەردا گیراوە، بەهۆیانەوە 118 کەس دراونەتە دادگە و دۆسییەی لێکۆڵینەوەیان بۆ کراوەتەوە.

 

بەگوێرەی ئاماری پۆلیسی دارستان و ژینگەی هەرێمی کوردستان، ساڵی رابردوو زیاتر لە پێنج هەزار داری تەڕ لە هەرێمی کوردستان بڕاونەتەوە.