هاونیشتمانییەک لە کاتی بەفربارینی پار لە سنووری هەولێر. وێنە: بڵند تاهیر - رووداو
رووداو دیجیتاڵ
نزمترین پلەی گەرمای تۆمارکراو ئەمڕۆ لە حاجی ئۆمەران بووە بە 9 پلە ژێر سفر. گوتەبێژی وەزارەتی گواستنەوە دەڵێت، ئەمڕۆ "ئەگەر هەیە" بەفر لە سەنتەری شارەکانی سلێمانی و دهۆک ببارێت. کەشناسێکێش دەڵێت، ئەم شەپۆلە تاوەکو چوارشەممە بەردەوام دەبێت و رۆژی پێنجشەممە کەشوهەوا جێگیر دەبێتەوە.
رۆژی شەممە، 4-2-2023، دیلان رەشاد، گوتەبێژی وەزارەتی گواستنەوەی هەرێمی کوردستان بە تۆڕی میدیایی رووداوی گوت، لە دوای نیوەرۆی ئەمڕۆوە بارانبارین لە ناوچەکانی باکووری رۆژئاوای هەرێمی کوردستان دەستپێدەکات و شەو دابارین زیاد دەکات و زۆربەی ناوچەکانی هەرێمی کوردستان دەگرێتەوە.
دیلان رەشاد ئاماژەی بەوەشکرد، بەفر لە ناوچە شاخاوییەکان دەبارێت و "ئەگەر هەیە سەنتەری سلێمانی و دهۆکیش بگرێتەوە".
کەشناسیی هەرێمی کوردستان لە راگەیێندراوێکدا سەبارەت بە کەشوهەوای سبەی یەکشەممە بڵاویکردەوە، ئاسمان هەوری باراناوی دەبێت و لە ناوچە شاخاوییەکانیش بەفر دەبارێت.
ئاراس جەبار، شارەزای کەشناسی بە تۆڕی میدیایی رووداوی گوت، ئەم شەپۆلە بایەکی ساردی لەگەڵ دەبێت و تاوەکو رۆژی چوارشەممە بەردەوام دەبێت و رۆژی پێنجشەممە دۆخەکە ئاسایی دەبێتەوە و کەشوهەوا جێگیر دەبێت.
بەگوێرەی کەشناسیی هەرێمی کوردستان، بەرزترین پلەی گەرمای سبەی لە باشووری کوردستان بەمشێوەیەی خوارەوە دەبێت:
- هەولێر؛ 10 پلەی سیلیزی
- سلێمانی؛ 6 پلەی سیلیزی
- دهۆک؛ 7 پلەی سیلیزی
- کەرکووک؛ 13 پلەی سیلیزی
- هەڵەبجە؛ 8 پلەی سیلیزی
- زاخۆ؛ 8 پلەی سیلیزی
- سۆران؛ 4 پلەی سیلیزی
- گەرمیان؛ 16 پلەی سیلیزی
هەر بەگوێرەی کەشناسیی هەرێمی کوردستان، نزمترین پلەی گەرما کە ئەمڕۆ شەممە تۆمارکرابێت لە حاجی ئۆمەران بووە کە 9 پلە ژێر سفر بووە، هەروەها لە ئامێدی 4 پلە ژێر سفر، لە سۆران یەک پلە ژێر سفر، لە سلێمانی، دهۆک و هەڵەبجە پلەی گەرما سفر بووە و لە هەولێریش نزمترین پلە یەک پلەی سیلزی تۆمارکراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ