هەڵەیەک روویدا! دووبارە هەوڵبدە
رووداو دیجیتاڵ
بە بڕیاری بەڕێوەبەری پۆلیسی کەرکووک، عەقید مستەفا نەوزاد، بەڕێوەبەری بازگەکانی کەرکووک لە پۆستەکەی دوورخرایەوە و عەقید ئەرکان ئەکرەم لە شوێنەکەی دانرا.
رۆژی هەینی، 22-11-2024، عەمید سابیر محەممەد، بەرپرسی راگەیاندنی پۆلیسی کەرکووک بە تۆڕی میدیایی رووداوی راگەیاند: "جگە لە بابەتی رێگری لە گەڕانەوەی هاونیشتمانیان بۆ کەرکووک لە بازگەی پردێ، عەقید مستەفا چەند دۆسیەیەکی دیکەی لەسەر بووە و ئێستا لەلایەن وەزارەتی ناوخۆی عێراق لێکۆڵینەوەی لەگەڵ دەکرێت."
شەوی پێنجشەممە وەزارەتى ناوخۆى عێراق لە راگەیێندراوێکدا رەتیکردەوە، دەستگیرکردنى ئەفسەر و کارمەندانى وەزارەتەکەى لە بازگەکانى کەرکووک پەیوەندى بە سەرژمێریی گشتیى دانیشتووانەوە هەبووبێت."
ئەو وەزارەتە ئاماژەى بەوەدابوو کە لە تۆڕە کۆمەڵایەتییەکان وا بڵاوکراوەتەوە کە ئەو ئەفسەر و کارمەندانەى بازگەکانى نێوان پارێزگاکان لە کەرکووک لەوانەش بەڕێوەبەری بازگەکان، بە هۆکارى نادیار دەستگیرکراون و هەندێک هەوڵیانداوە بیبەستنەوە بە سەرژمێریى گشتیى دانیشتووان.
وەزارەتى ناوخۆى عێراق رایگەیاند: "ئەو پرسە پەیوەندى بە سەرژمێرییەوە نەبووە، بەڵکو پەیوەندار بووە بە رێکارى کارگێڕی و لێکۆڵینەوە لەلایەن ئەو وەزارەتەوە لەگەڵ 18 ئەفسەر و کارمەند کە گەندەڵى دارایی لەو بازگانە لە سەریان سەلمێندراوە و راگیراون."
دەستگیرکردنى ئەو ئەفسەرانە بۆ شەوى 19 لەسەر 20ـی تشرینى دووەمی 2024 بەر لە دەستپێکردنى یەکەم رۆژى سەرژمێرى بوو.
وەزارەتى ناوخۆى عێراق ئاماژەى بەوەداوە لە بازگەکانى کەرکووک ئەفسەر و کارمەند هەن، کە بەشێوەیەکى سروشتى کارى خۆیان دەکەن و دەڵێت: "تۆمەتى هەڵبەستراو رەتدەکەینەوە و مافى گرتنەبەرى رێوشوێنى یاساییمان هەیە بەرامبەر شێواندنى راستییەکان و دەستوەردان لە کارە یاسایی و کارگێڕییەکانمان".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ