بریندارێکی خۆپێشاندانەکانی مهاباد لە زیندان گیانی لەدەستدا

 

بەپێی راپۆرتی رێکخراوەکانی مافی مرۆڤ، سەردار قادری لە ورمێ بەهۆی سەختی برینەکەی لە زیندان گیانی لەدەستداوە. ئەو هاونیشتمانییە شەوی یەکشەممە 20-11-2022 لە خۆپێشاندانەکانی مهاباد لە ئەنجامی تەقەی هێزەکانی ئێران برینداربوو و رۆژێک دواتر لەلایەن هێزە ئەمنییەکانەوە دەستبەسەر کرا و بۆ ورمێ گواسترایەوە. 

 

رێکخراوەکانی مافی مرۆڤ دەڵێن، ئەو هاونیشتمانییە رۆژی سێشەممە گیانی لەدەستداوە و داوای بڕی 200 ملیۆن تمەن پارە لە کەسوکاری کراوە بۆ رادەستکردنەوەی تەرمەکەی. 

 

سەردار قادری 36 ساڵان خێزاندارە، باوکی دوو منداڵە و تاوەکو ئێستا روون نەبووەتەوە دوای دەستبەسەرکردن بردراوەتە زیندان یان هەر لە زیندانی هێزە ئەمنییەکان راگیراوە. 

 

لە خۆپێشاندان و ناڕەزاییەکانی رۆژهەڵاتی کوردستاندا لانیکەم 116 هاونیشتمانی بە تەقەی هێزەکانی ئێران گیانیان لەدەستداوە.